Matur

Marengstoppar með þristabitum – einfaldlega lostæti!

Sylvía Rut Sigfúsdóttir skrifar
Þristatoppar sem væru fullkomnir fyrir jólabaksturinn.
Þristatoppar sem væru fullkomnir fyrir jólabaksturinn. Heiðdís Guðbjörg Gunnarsdóttir

Eva Laufey Kjaran matgæðingur og fjölmiðlakona gaf út nýja bók á dögunum, Bakað með Evu. Í næstu viku fer hún svo aftur af stað með nýja þáttaröð af matreiðsluþáttunum Blindur bakstur.

Við fengum Evu til að deila einni uppskrift úr nýju bókinni með lesendum. Þessir eru fullkomnir fyrir jólabaksturinn. 

„Ég myndi segja að þessar væru í eftirlæti hjá mínum fjölskyldumeðlimum fyrir jólin, þær klárast nánast jafn óðum og ég tek þær út úr ofninum. Hægt er leika sér með súkkulaðitegundir og um að gera að leyfa hugmyndafluginu að njóta sín,“ segir Eva Laufey.

„Það sem mestu máli skiptir í þessari uppskrift og líkt og öðrum marengsuppskriftum er að þeyta eggjahvíturnar nógu lengi. Hrærivélin fær aðeins að finna fyrir því en allt er það vel þess virði þegar kakan er komin í munninn.“

Uppskriftin hér fyrir neðan gerir um það bil 30 marengstoppa. 

Hráefni:

  • 3 eggjahvítur
  • 200 g púðursykur
  • 150 g Þristur súkkulaði, smátt saxað

Aðferð:

  1. Forhitið ofninn í 140°C (undir og yfirhiti)
  2. Þeytið eggjahvítur þar til froða byrjar og myndast, hellið sykrinum smám saman við og þeytið í 5-6 mínútur eða þar til marengsinn er stífþeyttur.
  3. Saxið súkkulaðið mjög smátt og blandið varlega saman við stífþeyttu eggjahvíturnar.
  4. Mótið toppa með tveimur teskeiðum eða setjið deigið í sprautupoka og sprautið á pappírsklædda ofnplötu.
  5. Bakið við 140°C í 20 mínútur.
Heiðdís Guðbjörg Gunnarsdóttir



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.