Viðskipti innlent

Fékk húsnæði á góðum kjörum frá eigendum Svefns og heilsu

Kolbeinn Tumi Daðason skrifar
Jói Fel stefnir nú á opnun nýs veitingastaðar í Listhúsinu sem hann stefnir á að opna fyrir jól.
Jói Fel stefnir nú á opnun nýs veitingastaðar í Listhúsinu sem hann stefnir á að opna fyrir jól.

Felino er nýr pítsustaður sem bakarinn Jóhannes Felixson ætlar að opna í Listhúsinu í Laugardal í desember. Eigendur húsnæðisins taka Jóhannesi fagnandi hafa komist að samkomulagi við hann um notkun húsnæðisins sem þó felur ekki í sér leigusamning. 

Felino er nýr pítsustaður sem bakarinn Jóhannes Felixson ætlar að opna í Listhúsinu í Laugardal í desember. Eiginkona Jóhannesar er skráður eigandi staðarins og eini stjórnarmaðurinn utan hennar í fyrirtækinu nýja er Björn Leifsson, oftast kenndur við World Class.

Jóhannes greindi Vísi frá opnun nýja staðarins í viðtali á mánudaginn. Aðspurður sagðist hann ekki vera einn í rekstrinum en vildi ekki ræða frekar hverjir stæðu að honum með sér. Hann væri í aðalhlutverki þegar kæmi að nýja staðnum. Ljóst er að töluvert fjármagn þarf til að koma nýjum veitingastað á koppinn.

Þegar félaginu er flett upp í fyrirtækjaskrá CreditInfo kemur í ljós að félagið Felino ehf. var skráð í lok maí. Kristín Eva Sveinsdóttir, kærasta Jóhannesar og framkvæmdastjóri Þjónustumiðstöðvar rannsóknarverkefna, er skráður eini eigandi fyrirtækisins og stjórnarmaður.

Þá er Björn Leifsson, eigandi World Class ásamt konu sinni Hafdísi Jónsdóttur, skráður varamaður í stjórn. Þar með eru stjórnarmenn upptaldir. Björn og Jóhannes eru góðir vinir og lyfta reglulega saman lóðum í World Class.

Björn Leifsson segir aðspurður að staðið hefði til á tímabil að hann kæmi að rekstri pítsasaðar með Jóhannesi. En það hafi ekki orðið af því. Hans aðkoma að staðnum sé því engin. Líklega eigi eftir að uppfæra skráningu stjórnarmanna í fyrirtækjaskrá Credit Info.

Veitingastaðurinn verður í Listhúsinu við Engjateig þar sem Gló var áður til húsa. Eigendur húsnæðisins eru Elísabet Traustadóttir og Sigurður Matthíasson, sem reka Svefn og heilsu í sama húsnæði.

Elísabet segir í samtali við Vísi að þau hafi útvegað húsnæði undir staðinn. Þannig sé aðkoma þeirra að rekstrinum. Þeirra hagur felist í því að fá starfsemi í húsnæðið sem verði um leið gert fínt og flott.

„Þetta verður geggjaður staður og gott að hafa þau í húsinu,“ segir Elísabet og er greinilega spennt. Ekki sé um leigusamning að ræða við Jóhannes heldur samkomulag.

Jói Fel rak lengi vel Bakarí Jóa Fel sem finna mátti víða um land. Bakarísreksturinn var lýstur gjaldþrota þann 24. september í fyrra eftir að Lífeyrissjóður verslunarmanna gerði kröfu um það á grundvelli vangoldinna iðgjalda.

Bakaríin voru víða á höfuðborgarsæðinu, til að mynda í Holtagörðum, Borgartúni, í JL-húsinu, Smáralind, Spönginni og Garðabæ. Í september í fyrra hafði þeim öllum verið lokað nema í Holtagörðum og Spönginni. Bakaríinu í Borgartúni hafði verið lokað eftir að eigandi húsnæðisins höfðaði útburðarmál vegna vangoldinnar leigu.

Svo fór að Bakarameistarinn keypti eignir í þrotabúi Jóa Fel og hóf rekstur eigin bakaría á völdum stöðum.


Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.