Ökumaður stöðvaður með snjóþotu í eftirdragi

Hólmfríður Gísladóttir skrifar 30. nóvember 2021 06:31

Hvít breiða lagðist yfir höfuðborgina í gær. Vísir/Vilhelm

Lögreglan á höfuðborgarsvæðinu stöðvaði ökumann um klukkan 1 í nótt sem var staðinn að því að draga snjóþotu sem ungmenni sat á. Var málið tilkynnt foreldrum og barnavernd.

Þá var ökumaður stöðvaður á stolnu ökutæki en sá reyndist í annarlegu ástandi og gisti fangageymslu.

Það gerðu fleiri en rétt fyrir klukkan 3 barst lögreglu tilkynning um mann í annarlegu ástandi sem reyndist ekki eiga í nein hús að vernda og fékk gistingu í fangageymslu. Þá var einstaklingur handtekinn við innbrot og var hann sömuleiðis vistaður í fangageymslu.

Lögreglu barst einnig tilkynning um leigubílstjóra í vandræðum með farþega en málið var leyst á vettvangi. Þá var einnig tilkynnt um skemmdarverk á aksturshliði í miðborginni og talið mögulegt að ekið hafi verið á hliðið og stungið af.

Eftirlitsmyndavélar eru á staðnum.

Lögreglumál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.