Taylor hljóp 185 jarda með boltann í leiknum og skoraði alls fimm snertimörk framhjá Bills vörninni. Fjögur fyrstu snertimörkin voru á jörðinni en það síðasta kom eftir sendingu.

Taylor hefur nú farið að minnsta kosti hundrað jarda með boltann og skorað að minnsta kosti eitt snertimark að auki í átta leikjum í röð í NFL-deildinni sem er metjöfnun.

Buffalo liðið tapaði fjórum boltum í leiknum og eftir þetta tap hefur liðið misst toppsætið til New England Patriots sem vann sinn leik á fimmtudagskvöldið. Framundan eru síðan tveir spennandi leikir á milli Patriots og Bills í desembermánuði.

Minnesota Vikings liðið hefur tapað nokkrum leikjum á grátlegan hátt á þessu tímabili en lukkudísirnar voru með þeim í lokin í 34-31 sigri á nágrönnunum í Green Bay Packers.

Það leit út fyrir að Green Bay Packers væri að fara að stela sigrinum þegar Marquez Valdes-Scantling skoraði eftir 75 jarda sendingu frá Aaron Rodgers og Kirk Cousins, leikstjórnandi Vikings, virtist hafa kastað boltanum frá sér í kjölfarið. Það var hins vegar kallað til baka og Cousins tókst að fara með Vikings liðið upp völlinn. Sparkarinn Greg Joseph tryggði liðinu síðan 34-31 sigur með vallarmarki um leið og leiktíminn rann út.

Leikur Kansas City Chiefs og Dallas Cowboys átti að vera leikur tveggja bestu sókna deildarinnar en það voru varnirnar sem stálu senunni. Sérstaklega vörn Chiefs liðsins sem hefur verið gagnrýnd harðlega í allan vetur. Tengdasonurinn Patrick Mahomes og félagar í Chiefs þurftu því ekki að skora mikið til vinna 19-9 sigur.

Ein óvæntustu úrslitin var sigur Houston Texans á Tennessee Titans. Texans liðið var búið að tapa átta leikjum í röð og Titans með einn besta árangurinn í deildinni. Leikstjórnandinn Tyrod Taylor skoraði tvö snertimörk sjálfur og varnarmaðurinn Desmond King II komst inn í tvær sendingar hjá Titans liðinu í fjórða leikhlutanum.

Taylor Heinicke átti þrjár snertimörk þegar Washington Football Team vann 27-21 sigur á Carolina Panthers. Cam Newton kom aftur í byrjunarlið Panthers og átti flottan leik en náði ekki að leiða liðið til sigurs.

Baltimore Ravens vann 16-13 sigur á Chicago Bears þrátt fyrir að missa leikstjórnandann sinn Lamar Jackson í veikindi skömmu fyrir leik. Bears var yfir 13-9 en varaleikstjórnandinn Tyler Huntley fór upp allan völlinn í lokasókninni og hlauparinn Devonta Freeman tryggði sigurinn með snertimarki 22 sekúndum fyrir leikslok.

Stjörnuleikstjórnandinn Kyler Murray missti af þriðja leiknum í röð en lið hans Arizona Cardinals, hefur náð að vinna tvo þeirra þar af 23-13 sigur á Seattle Seahawks í gær. Arizona liðið er nú á toppi deildarinnar með níu sigra og aðeins tvö töp.

Cardinals hefur verið án Murray og stjörnuútherjans DeAndre Hopkins í síðustu þremur leikjum en þeir ættu að koma til baka í næsta leik sem verður ekki fyrr en eftir tvær vikur. Cardinals menn eiga frí í næstu umferð.