Viðskipti innlent

Anna ekki eftirspurn eftir PS5 fyrir jólin og færa alla söluna á netið

Samúel Karl Ólason skrifar
Arinbjörn Hauksson, markaðsstjóri ELKO.
Arinbjörn Hauksson, markaðsstjóri ELKO.

Forsvarsmenn ELKO hafa gripið til sérstakra ráðstafana vegna skorts á PlayStation 5 leikjatölvum og sjá að ekki verði hægt að anna eftirspurn fyrir jólin. Þegar sendingar berast seljast þær upp á nokkrum mínútum.

ELKO ætlar því að beina sölunni á leikjatölvunum á vefinn, líkt og áður, til að jafna aðstæður viðskiptavina.

Fregnir hafa borist af því að Sony hafi dregið úr framleiðslumarkmiðum sínum vegna heimslægs skorts á hálfleiðurum sem hefur komið niður á tækjaframleiðendum um allan heim og vegna vandræða við vöruflutninga.

Áætlað er að Sony framleiði um fimmtán milljónir tölva á uppgjörsárinu sem endar í mars 2022, en áður var ætlunin að gera sextán milljónir.

Sala leikjatölvanna hófst fyrir ári síðan en framboð hefur engan veginn annað eftirspurn síðan.

ELKO er einn af stærri söluaðilum PlayStation hér á landi og bíða þúsundir viðskiptavina eftir því að fá tölvupóst um að tölvan sé fáanleg á lager, samkvæmt tilkynningu.

„Þær sendingar sem við fáum seljast yfirleitt upp á örfáum mínútum en við sjáum mikið álag á vefnum í hvert skipti sem tölvan fer í sölu,“ segir Arinbjörn Hauksson, markaðsstjóri ELKO, í áðurnefndri tilkynningu.

Hann segir að því hafi verið ákveðið að beina allri sölu á PS5 á vefinn. Markmiðið sé að allir viðskiptavinir fái jafna möguleika á að næla sér í eintak, sama hvar þeir séu á landinu.

ELKO fær skamman fyrirvara um það hvenær sendingar og berast og hve margar PS5 eru á leiðinni en um leið og opnað er fyrir sölu fá viðskiptavinir sem hafa skráð sig fyrir tilkynningu tölvupóst um að salan hafi verið opnuð.

„Það fá því allir viðskiptavinir jafnan fyrirvara,“ segir Arinbjörn.

Arinbjörn mælir með því að þeir sem vilji koma höndum yfir PS5 noti „láttu mig vita“ hnappinn á vef ELKO. Von sé á einhverjum sendingum en fyrir liggi að færri muni fá eintök en vilja.

Fréttin hefur verið uppfærð





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.