Viðskipti innlent

Bónus lengir opnunar­tíma og gefur grísnum yfir­halningu

Atli Ísleifsson skrifar
„Það er verið að trimma hann aðeins til,“ segir Guðmundur Marteinsson, framkvæmdastjóri Bónus, um breytingarnar á Bónusgrísnum.
„Það er verið að trimma hann aðeins til,“ segir Guðmundur Marteinsson, framkvæmdastjóri Bónus, um breytingarnar á Bónusgrísnum.

Matvörurisinn Bónus hefur gert breytingar á útliti Bónusgríssins og þeirri leturgerð sem notast er við í firmamerki verslananna. Breytingarnar eru gerðar samhliða lengingu á opnunartíma verslana sem taka gildi í dag sem felur meðal annars í sér að sjö Bónusverslanir verða framvegis opnar til klukkan átta á kvöldin.

Glöggir netverjar tóku eftir því í gær að breytingar höfðu verið gerðar á hinum sérstaka Bónusgrís og sýndist sitt hverjum.

Guðmundur Marteinsson, framkvæmdastjóri Bónus, segir breytingarnar einfaldlega verið part af þróuninni.

Guðmundur Marteinsson, framkvæmdastjóri Bónus.Aðsend

„Það er verið að trimma hann aðeins til. Þetta er nú ekki mikil breyting. Það voru tekin tvö eða þrjú strik sem manni fannst alltaf að hafi gleymst að stroka út þegar hann var hannaður í upphafi,“ segir Guðmundur, og vísar þar í strik á baki gríssins og ofan á nefinu.

Sömuleiðis vekur athygli að vinstra auga gríssins hefur verið breytt. „Hann var alltaf hálftileygður. En eins og ég segi þá er þetta partur af þessari framþróun og verið að trimma hann til.“

Guðmundur segir gamla og nýja grísinn vera mjög svipaða og að ekki sé um mikla breytingu að ræða. „Þetta var sú breyting sem ég samþykkti og fannst næst hinum upprunalega. Það var ákveðið að fara í vinnu með að auðvelda framhaldið í auglýsingum. Þannig höfum verið að laga helling í auglýsingaefninu til að koma því á stafrænt form.“

Svara kalli neytenda með lengingu opnunartíma

Guðmundur segir breytingarnar gerðar á sama tíma og verið sé að lengja opnunartíma verslana. Sjö verslanir verði framvegis opnar frá 10 til 20 alla daga en í flestum öðrum verslunum lengist opnunartíminn frá 18:30 til klukkan 19. Þær sjö verslanir sem verða framvegis opnar til klukkan 20 eru á Smáratorgi, Skeifunni, Spönginni, Fiskislóð, Mosfellsbæ, Helluhrauni í Hafnarfirði og Langholti á Akureyri. Sömuleiðis hafa verið gerðar þær breytingar að Bónusverslanir muni opna fyrr á sunnudögum, eða klukkan 10 í stað 11.

Gamli grísinn vs nýi grísinn.

En eitthvað kostar þetta nú að gera allar þessar breytingar á grísnum og þá útliti verslana?

„Já, það er ekkert frítt. Það er bara svoleiðis. Við erum byrjuð á að breyta útlitinu í Skeifunni og Smáratorgi og við stefnum á að klára þessa vinnu á næstu tólf mánuðum. Við erum þekkt fyrir ekkert bruðl svo við munum endurnýta eins mikið af þeim skiltaflötum sem fyrir eru og hægt er. Þeir verða endurmerktir flestir. Við erum því ekki að bruðla með efnið.“

Guðmundur segir að Bónus sé að svara kalli neytenda með lengingu opnunartíma. „Þetta er sú kvörtun sem við fáum hvað mest. En við erum kostnaðaríhaldssöm og opnunartími er partur af kostnaði. En með því að halda opnunartímanum innan skynsemismarka – við erum ekki að lengja hann mikið – þá teljum við okkur geta framkvæmt þetta án þess að hækki mikið hjá okkur kostnað. Verðlag mun því ekki breytast út af þessari breytingu. Með þessu erum við þá líka að reyna að nýta fasteignir okkar betur,“ segir Guðmundur.

Ekki allir sáttir

Netverjar tóku einhverjir eftir breytingunni þegar Bónus uppfærði samfélagsmiðla sína og sýndist sitt hverjum eins og sjá má að neðan.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.