Atvinnulíf

Heimsþing kvenleiðtoga hefst á morgun í Hörpu

Rakel Sveinsdóttir skrifar
Frá Heimsþingi kvenleiðtoga árið 2020. Í ár mun Jóhanna Sigurðardóttir, fyrrverandi forsætisráðherra, hljóta heiðursverðlaun fyrir störf sín í þágu jafnréttis en eins verða kynntar nýjar niðurstöður rannsókna sem mælir afstöðu almennings um allan heim til karla og kvenna sem leiðtoga
Frá Heimsþingi kvenleiðtoga árið 2020. Í ár mun Jóhanna Sigurðardóttir, fyrrverandi forsætisráðherra, hljóta heiðursverðlaun fyrir störf sín í þágu jafnréttis en eins verða kynntar nýjar niðurstöður rannsókna sem mælir afstöðu almennings um allan heim til karla og kvenna sem leiðtoga

Á morgun, þriðjudag, hefst heimsþing kvenleiðtoga, Reykjavík Global Forum – Women Leaders (WPL) í fjórða sinn en þar munu um 600 kvenleiðtogar úr stjórnmálum, viðskiptum, fjölmiðlum og vísindum taka þátt, þar af 200 í Hörpu en 400 með rafrænum hætti.

Yfirskrift Heimsþingsins að þessu sinni er „Power together for progress“ en meðal þátttakenda í ár eru: 

Katrín Jakobsdóttir forsætisráðherra, Amina J. Mohammed aðstoðarframkvæmdastjóri SÞ, Pedro Sánchez forsætisráðherra Spánar, Michelle Bachelet mannréttindastjóri Sameinuðu þjóðanna og fyrrverandi forseti Chile, Ulrik Vestergaard Knudsen aðstoðarframkvæmdastjóri OECD, Christy Tanner forseti Tanner Media, Jacqueline Fuller forseti Google, Marjut Falkstedt framkvæmdastjóri Evrópska Fjárfestingarbankans, Amy Weaver fjármálastjóri Salesforc og Sima Sami Bahous framkvæmdastjóri UN Women.

Á Heimsþinginu eru alltaf veitt sérstakar jafnréttisviðurkenningar og í ár mun Jóhanna Sigurðardóttir, fyrrverandi forsætisráðherra, hljóta heiðursverðlaun fyrir störf sín í þágu jafnréttis.

Þá verða kynntar niðurstöður Reykjavik Index for Leadership 2021 í samstarfi við rannsóknarfyrirtækið Kantar sem mælir afstöðu almennings um allan heim til karla og kvenna sem leiðtoga. Viðhorf Íslendinga er nú mælt í fyrsta sinn og sá Félagsvísindastofnun Háskóla Íslands um framkvæmd könnunarinnar hér á landi. Ennfremur verður kynntur uppfærður Reykjavik Women World Atlas 2020 í samstarfi við McKinsey Institute þar sem hlutur kvenna sem leiðtoga er kortlagður eftir löndum.

Að venju eru leiðtogar víðs vegar úr heiminum meðal fyrirlesara á Heimsþingi kvenleiðtoga en í ár eru þátttakendur um 600 talsins. Heimsþingið er nú haldið í fjórða sinn og fer fram bæði í Hörpu og með rafrænum hætti.

Hanna Birna Kristjánsdóttir sérlegur ráðgjafi á aðalskrifstofu UN Women er stjórnarformaður Heimsþings kvenleiðtoga:

„Heimsþing kvenleiðtoga hefur vaxið mikið á þeim árum sem liðin eru frá því fyrsti viðburðurinn var haldinn hér á landi. Sá öflugi og stóri hópur kvenleiðtoga sem tekur þátt í viðburðinum reglulega er þó ekki það eina sem skiptir máli, heldur mælum við árangurinn miklu frekar í því hvernig þær lausnir og aðgerðir sem hér eru kynntar auka líkur á framförum í jafnréttismálum. Það hefur gengið afar vel og það skiptir mestu.“

Heimsþingið er haldið í samstarfi alþjóðlegu þingkvennasamtakanna Women Political Leaders, ríkisstjórnar Íslands og Alþingis, auk fjölda erlendra og innlendra samstarfsaðila. Þá er frú Vigdís Finnbogadóttir, fyrrverandi forseti, verndari Heimsþingsins líkt og verið hefur síðustu árin.

„Kvenleiðtogar frá öllum heimshornum fagna því að fá tækifæri til að læra af Íslandi í gegnum þátttöku í Heimsþingi kvenleiðtoga. Við erum mjög stolt af samstarfi okkar við ríkisstjórn Íslands, Alþingi og fleiri íslenska aðila sem staðfesta ár hvert hvers vegna Íslendingar geta verið stolt af stöðu sinni þegar kemur að jafnrétti. Við erum hér til að læra og ræða hvernig best má nýta reynsluna héðan öðrum þjóðum til hagsbóta,“ er haft eftir Silvönu Koch-Mehrin forseta og stofnanda WPL.

Í tilefni Heimsþingsins verður Atvinnulífið með ýmiss málefni kvenna í atvinnulífinu til umfjöllunar í þessari viku.


Tengdar fréttir

Launamunur mestur í karllægum starfsstéttum

„Fljótt á litið virðist þetta mjög tengt hve störfin eru kynbundin, í skrifstofuhópnum eru konur í miklum meirihluta og þar er jöfnuðurinn meiri en því hærra sem hlutfall karla er í starfsstéttinni þá eykst ójöfnuðurinn meiri,“ segir Víðir Ragnarsson, forstöðumaður ráðgjafar hjá PayAnalytics um niðurstöður nýrrar rannsóknar á launamunum kynjanna.

Stjórnarkonur ósáttar: Karlaklíkur útiloka konur í forstjórastólinn

Stjórnarkonur í skráðum félögum á Íslandi telja ráðningaferli í forstjórastól oft útilokandi fyrir konur. Þær kalla stjórnir í heild sinni til ábyrgðar. Þá telja margar ráðningaferlin oft meingölluð. Það eigi einnig við um ráðningar þar sem leitað er til fagaðila. Þetta og fleira kemur fram í niðurstöðum nýrrar rannsóknar sem birtar eru í dag og meira en helmingur stjórnarkvenna í skráðum félögum á Íslandi tók þátt í.

Konur sem berjast fyrir jafnrétti verða oft fyrir aðkasti

„Ég vona að lagasetningin sé innlegg í þá viðhorfbreytingu sem byggir á að konur geti tekið þátt í kynferðislegri háttsemi án þess að eiga á hætti að verða fyrir kynferðislegu ofbeldi. Það er ekki bara áfall og kostnaður fyrir einstaklinga sem fyrir slíku verða, heldur samfélagið og þannig atvinnulífið,” segir María Bjarnadóttir lögfræðingur, en hún skrifaði greiningagerðina fyrir íslensk stjórnvöld sem ný lög um stafrænt ofbeldi byggir á.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.