Viðskipti innlent

Tvö til­boð bárust í þetta skiptið vegna við­byggingar við Akur­eyrar­flug­völl

Atli Ísleifsson skrifar
Frá 15. júní síðastliðinn.
Frá 15. júní síðastliðinn. Isavia

Tvö tilboð bárust Isavia Innanlandsflugvöllum í viðbætur og breytingar á flugstöðinni á Akureyrarflugvelli. Tilboðin bárust frá verktakafyrirtækjunum Húsheild og Hyrna, en þetta var í annað sitt sem verkið var boðið út.

Þetta kemur fram í tilkynningu frá Isavia, en tilboð Húsheildar hljóðar upp á tæpar 865 milljónir króna en tilboð Hyrnu upp á rúmar 810 milljónir króna.

Verkefnið felur í sér viðbyggingu við núverandi flugstöð og breytingu á núverandi húsnæði flugstöðvarinnar og nánasta umhverfi. Fyrsta skóflustunga að viðbyggingunni var tekin í júní síðastliðnum.

Viðbyggingin við flugstöðina á að vera 1.100 fermetrar með aðstöðu fyrir toll og lögreglu, fríhöfn og veitingastað.Isavia

Ákveðið var að bjóða verkið út á ný í september eftir að ákveðið var að hafna eina tilboðinu sem barst. Húsheild var þá eini aðilinn sem bauð í verkið og hljóðaði tilboðið þá upp á 910 milljónir króna. Var það sagt mun hærra en kostnaðaráætlun gerði ráð fyrir.

Í tilkynningunni frá Isavia er haft eftir Sigrúnu Björk Jakobsdóttur, framkvæmdastjóra Isavia Innanlandsflugvalla, að nú verði farið ítarlega yfir þau tvö tilboð sem bárust.

„Verkefnið sem hér um ræðir er 1.100 fermetra viðbygging við flugstöðina með góðri aðstöðu fyrir toll og lögreglu, fríhöfn og veitingastað. Áætlað er að heildarverkefninu verið lokið síðsumars 2023,“ segir Sigrún Björk.

Hjördís Þórhallsdóttir, flugvallarstjóri á Akureyrarflugvelli, Sigurður Ingi Jóhannsson, samgöngu- og sveitarstjórnarráðherra, og Sigrún Björn Jakobsdóttir, framkvæmdastjóri Isavia Innanlandsflugvalla. Myndin er tekin í tilefni af fyrstu skólfustungu verksins í júní síðastliðinn.Isavia

Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×