Breytingar á gjaldskrá Strætó samhliða innreið Klapp-greiðslukerfisins

Atli Ísleifsson skrifar 2. nóvember 2021 12:19

Engin breyting verður gerð á stöku fargjaldi fyrir fullorðna. Það verður áfram 490 krónur. Vísir/Vilhelm

Samhliða innleiðingu á nýja rafræna greiðslukerfinu Klapp þann 16. nóvember 2021 verða einnig gerðar breytingar á gjaldskrá Strætó.

Í tilkynningu frá Strætó segir að markmið breytingarinnar sé fyrst og fremst að einfalda gjaldskrána og gera öllum hópum kleift að kaupa mánaðarkort á hagstæðu verði.

Almennt fargjald fyrir fullorðna verður eftirfarandi:

Ungmenni, aldraðir og nemar* eiga rétt á 50% afslætti.
Öryrkjar eiga rétt á 70% afslætti
Börn yngri en 11 ára ferðast frítt með Strætó.

* Nemar fá 50% afslátt af tímabilskortum en ekki af stökum fargjöldum.

Hér fyrir neðan verður farið nánar yfir það hvernig gjaldskráin breytist fyrir eftirfarandi hópa.

Almenn fargjöld

Engin breyting verður gerð á stöku fargjaldi fyrir fullorðna. Það verður áfram 490 kr.

Mánaðarkort fyrir fullorðna mun lækka úr 13.300 kr. niður í 8.000 kr. Tilboðið þar sem þriðji hver mánuður er frír í appinu verður ekki lengur í boði.

Engin breyting verður gerð á árskorti fyrir fullorðna. Þau kosta áfram 80.000 kr.

KLAPP heitir nýja greiðslukerfið í Strætó.Stöð 2/Egill

Ungmenni 12-17 ára

Ungmenni fá 50% afslátt af almennum fargjöldum.

Engin breyting verður gerð á stöku fargjaldi fyrir ungmenni. Þau munu áfram greiða 245 kr.

Í dag geta ungmenni eingöngu keypt árskort á afslætti. Við breytinguna opnast möguleiki fyrir þennan hóp að kaupa mánaðarkort á 4.000 kr.

Árskort ungmenna munu hækka við þessa breytingu. Þau fara úr 25.000 kr. og upp í 40.000 kr.

Öryrkjar

Öryrkjar fá 70% afslátt af almennum fargjöldum.

Stakt fargjald fyrir öryrkja lækkar úr 245 kr. niður í 170 kr.

Í dag geta öryrkjar eingöngu keypt árskort á afslætti. Við breytinguna opnast möguleiki fyrir þá að kaupa mánaðarkort á 2.400 kr.

Árskort fyrir öryrkja lækkar eftir breytinguna um 1.000 kr. og mun því kosta 24.000 kr. í stað 25.000 kr.

Til þess að geta keypt fargjöld á 70% afslætti þá er nauðsynlegt að öryrkjar stofni aðgang að mínum síðum inn á klappid.is og staðfesti sig með rafrænum skilríkjum.

Aldraðir, 67 ára og eldri

Aldraðir fá 50% afslátt af almennum fargjöldum.

Engin breyting verður gerð á stöku fargjaldi fyrir aldraða. Þau munu áfram greiða 245 kr.

Í dag geta aldraðir eingöngu keypt árskort á afslætti. Við breytinguna opnast möguleiki fyrir þá að kaupa mánaðarkort á 4.000 kr.

Árskort aldraðra munu hækka við þessa breytingu. Þau fara úr 25.000 kr. og upp í 40.000 kr.

Nemar fá 50% afslátt af tímabilskortum.Nemar, 18 ára og eldri

Engin breyting verður gerð á stöku fargjaldi fyrir nema sem eru 18 ára og eldri. Það verður áfram 490 kr.

Í dag geta nemar eingöngu keypt árskort eða 6 mánaðakort á afslætti. Við breytinguna opnast möguleiki fyrir nemendur að kaupa mánaðarkort á 4.000 kr.

Árskort fyrir nema mun lækka úr 54.500 kr. og niður í 40.000 kr.

Til þess að geta keypt mánaðarkort eða árskort á 50% afslætti þá er nauðsynlegt að nemar stofni aðgang að mínum síðum inn á klappid.is og staðfesti sig með rafrænum skilríkjum.

Hvað gerist með gamla farmiða og gömul strætókort?

Frá og með 1. mars 2022, þá verður ekki lengur hægt að greiða með farmiðum um borð í Strætó á höfuðborgarsvæðinu. Gefinn verður frestur til 16. mars 2022 til þess að skipta öllum gömlum farmiðum yfir í inneign í KLAPP greiðslukerfinu.

Handhafar tímabilskorta í gamla greiðslukerfi Strætó skulu leyfa gildistíma kortanna að renna út áður en skipt er yfir í KLAPP greiðslukerfið.

Það verður áfram hægt að greiða með reiðufé um borð í Strætó.

Þessi breyting tekur gildi 16. nóvember 2021,“ segir í tilkynningunni.

Strætó Reykjavík Seltjarnarnes Mosfellsbær Hafnarfjörður Kópavogur Garðabær

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.