Atvinnulíf

Þegar snobbaðir vinnufélagar fara í taugarnar á þér

Rakel Sveinsdóttir skrifar
Snobbhegðun er oftast vísbending um að viðkomandi glímir við eitthvað óöryggi. Að láta snobb vinnufélaga fara í taugarnar á okkur er alger óþarfa eyðsla á okkar orku.
Snobbhegðun er oftast vísbending um að viðkomandi glímir við eitthvað óöryggi. Að láta snobb vinnufélaga fara í taugarnar á okkur er alger óþarfa eyðsla á okkar orku. Vísir/Getty

Það er með ólíkindum hvernig hugurinn getur fengið okkur til að eyða orku að óþörfu. Mjög oft þá að láta eitthvað í fari annarra fara óskaplega í taugarnar á okkur. Til dæmis þeirra snobb.

Þetta getur verið snobb sem birtist í klæðnaði, tali eða þeirri hegðun að snobba fyrir öðru fólki.

Þegar einhver fer í taugarnar á okkur í vinnunni, getur það haft svo truflandi áhrif á okkur að við nánast missum niður gleðina þegar að við erum í návist viðkomandi. Til dæmis á fundum, við kaffivélina eða í hádegismatnum. 

Já, við hreinlega andvörpum innra með okkur.

En hér eru nokkur ráð til þess að hætta að láta snobb vinnufélaga fara í taugarnar á þér.

1. Snobb þrífst á athygli

Að vera snobbaður er oftast leið fólks til að reyna að setja sig á einhvern stall eða marka sér stöðu. Þetta á við bæði um það þegar fólk sýnir snobbaða hegðun sjálft, til dæmis í klæðaburði eða tali, eða snobbar fyrir öðru fólki.

Hver svo sem birtingarmyndin er, er fyrsta reglan þessi: Láttu sem þú sjáir þetta ekki;

Já, hunsaðu snobbið.

2. Sýndu óörygginu skilning

Snobb er oft vísbending eða staðfesting á því að viðkomandi er að glíma við einhvers konar óöryggi með sjálfan sig. 

Sýndu þessu óöryggi skilning frekar en dómhörku.

3. Ekki „elta“ 

Ef þér finnst snobbið sem fer í taugarnar á þér endurspeglast í til dæmis í merkjavörum eða að snobba fyrir ákveðnu fólki (oft yfirmönnum eða ríku fólki), ekki falla í þá gryfju að fara að „elta“ snobbið og reyna að vera eins. 

Að eltast við að vera eins og annað fólk frekar en við sjálf er aldrei rétt leið. 

4. Þitt eigið sjálfsmat

Að láta snobb fara í taugarnar á þér gæti verið vísbending um að þú þurfir að huga að þínu eigin sjálfsmati. Það besta sem við gerum fyrir okkur sjálf er að byggja upp okkar eigið sjálfsmat og sjálfsöryggi. 

Við eigum alltaf að hafa trú á okkur sjálfum.

5. Hreinskilni og heiðarleiki

Hvað raunverulega skýrir það út að þú lætur snobbið fara í taugarnar á þér? Gefðu þér tíma í að kryfja það hvers vegna eitthvað í fari annars fólks er að eyða þinni orku. 

Hér skiptir mestu máli að vera hreinskilin við okkur sjálf og vinna síðan út frá svarinu. Því á endanum er það ekki öðru fólki að kenna að við erum pirruð; það er okkar að stjórna okkar eigin líðan og hugsunum.


Tengdar fréttir

Sjálfsmyndin oft erfið stjórnendum og hálauna fólki

Kanntu að gera skil á milli þín og vinnunnar? Eða byggir sjálfsmatið þitt á stöðugildinu sem þú sinnir í dag? Að starfsferillinn hafi í raun yfirtekið sjálfsmyndina er staða sem margir eru í, en oft óafvitandi. 

Einkenni og afleiðingar fitufordóma á vinnustöðum

Getur verið að þú haldir um margt fólk í ofþyngd að það séu hálfgerðir letingjar? Eða að viðkomandi sé ekkert rosalega klár? Ertu með yfirlýsingar um að fólk í ofþyngd sé með litla sjálfstjórn og almennt ekki hraust? Finnst þér fólk í ofþyngd minna spennandi í ásýnd og útliti? 

Einkenni algengra aldursfordóma á vinnustöðum

Aldursfordómar hafa orðið nokkuð undir í umræðum síðustu ára um fordóma á vinnustöðum og forvarnir gegn þeim. Meira er rætt um aðgerðir og forvarnir gegn kynfordómum, kynvitund, kynhneigð, þjóðerni og trú. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×