Alex Morgan segir kyn­ferðis­lega á­reitni vand­amál í banda­rísku kvenna­deildinni

Alex Morgan er leikmaður Orlando Pride og hefur skorað yfir hundrað mörk fyrir bandaríska landsliðið.

North Carolina Courage liðið rak í síðustu viku þjálfarann Paul Riley vegna ásakana um áratugalanga harðstjórn, kynferðislega áreitni og óviðeigandi ummæla um þyngd og kynhneigð leikmanna.

Tilkynningin kom fram eftir að The Athletic sagði frá rannsókn þar sem blaðamenn töluðu við yfir tólf leikmenn úr öllum liðunum sem Riley hafði þjálfað frá árinu 2010. Eitt félaganna hafði látið hann fara vegna svona máls en sagði ekki frá því og hann fékk því annað starf í deildinni.

Meðal fórnarlambanna og þeirra sem tjáðu sig við The Athletic voru þær Mana Shim og Sinead Farrelly sem komu fram undir nafni og fóru meðal annars í „Today" þáttinn á NBC sjónvarpsstöðinni til að ræða vanhæfni deildarinnar til að taka á þessu vandamáli.

Morgan kallar eftir því að deildin vinni nú markvisst að því að setja upp stefnumál sem snúa að því að verja leikmenn fyrir kynferðislegri áreitni.

„Ég er hér til að styðja Mönu og Sinead og til að hjálpa röddum þeirra að heyrast. Ég vil líka sýna að þennan kerfisgalla í deildinni og hversu illa þeir tóku á máli Mana sem og hvernig þeir brugðust þeim Mönu og Sinead og örugglega mörgum öðrum konum,“ sagði Alex Morgan sem vill meina að kynferðisleg áreitni sé viðvarandi vandamál í bandarísku kvennadeildinni.

Stóra vandamálið er að það eru engar reglugerðir til staðar eða verklag til að hjálpa konum að koma slíkum málum í réttan farveg.

„Þegar ég horfi til baka, þá reyndi ég að vera eins góður vinur og liðsfélagi Mönu og ég gat. Ég hjálpaði henni að senda inn kvörtun en á þessum tíma var engin vettvangur fyrir slíkt mál innan kerfisins. Deildin gerði ekkert til að koma til móts við leikmenn sína í svona málum og það var ómögulegt að tilkynna slíkt,“ sagði Morgan.

„Við erum nú byrjuð að reyna að búa til rétta vettvanginn fyrir slíkar kvartanir en það er vegna kröfu leikmanna en ekki af því að deildin sé að vinna fyrirbyggjandi vinnu. Nú biðjum við deildina að vinna fyrirbyggjandi vinnu en ekki halda áfram að bregðast við eftir á. Við erum að biðja um gagnsæi,“ sagði Alex Morgan.