„Stjórnarandstaðan skíttapaði einfaldlega“

Jakob Bjarnar skrifar 26. september 2021 14:40

Logi Einarsson formaður Samfylkingarinnar segir einsýnt að nú þyrfi að horfa inn á við. Og það gerir Össur Skarphéðinsson forveri hans á formannsstóli og degur ekki af sér: Stjórnarandstaðan skíttapaði kosningunum einfaldlega og þar má kenna sundurlyndi um. vísir/vilhelm

Samfylkingarfólk veltir fyrir sér hvað hafi eiginlega gerst í kosningunum? Óhætt er að segja að vinstri menn vita vart hvaðan á þá stendur veðrið en þeir gengu vonglaðir til kosninga eftir að skoðanakannanir höfðu gefið fyrirheit um betri tíð með blóm í haga. Össur Skarphéðinsson, fyrrverandi formaður Samfylkingarinnar, segir stjórnarandstöðuna einfaldlega hafa skíttapað kosningabaráttunni.

Þetta gerir hann á Facebook-síðu Halldórs Guðmundssonar rithöfundar og stuðningsmanns Samfylkingarinnar. En Halldór vitnar í Stein Steinarr:

Og loks er eins og ekkert hafi gerst,

orti Steinn.

Seðlabankastjóri skaut Viðreisn á flugi

Halldór spyr: „Var ekki meginbreyting kosninganna sú að Framsókn endurheimti kjósendur sína frá Miðflokknum? Og sundrað vinstrið tapaði.“

Samfylkingarfólk reynir nú að rýna í stöðuna. Össur er einn þeirra en fáir eru eins vel lesnir í kosningum og hann. Össur segir að það sem gerðist sé engin tilviljun. Seðlabankastjóri hafi skotið Viðreisn sem var á góðu flugi niður með „makalaustri tímasetningu“ og vísar hann þar til viðtals Viðskiptablaðsins við Ásgeir Jónsson sem segir að verði krónan fest við evru, líkt og Viðreisn berst fyrir, geti það kallað á hærri stýrivexti.

„Samfylkingin fór mjög seint af stað og henni og Pírötum skorti málafylgju og forystu til að koma erindum sínum á framfæri, að frátalinni Kristrúnu [Frostadóttur].“

Samfylkingin afvelta eftir innanflokksátök

Og Össur hlífir sínum gamla flokki ekki:

„Stjórnarandstaðan skíttapaði einfaldlega kosningabaráttunni. Samfylkingin var afvelta eftir vetur innanflokksátaka þar sem vænsta fólki var rutt úr sætum og gersamlega tilefnislaus varaformannsslagur saxaði á limina hans Björns míns,“ segir Össur og hlífir félögum sínum hvergi.

Össur segir Samfylkingu hafa farið mjög seint af stað og henni hafi skort málafylgju og forystu.

Þó Samfylkingarfólk reyni nú að horfa inn á við, eins og Logi Einarsson formaður Samfylkingar hefur boðað að nú sé þörf á, vill Grímur Atlason, eiginmaður Helgu Völu Helgadóttur þingmans Samfylkingar, ekki gleypa útleggingar Össurar alveg hráar. Hann spyr hvort lýðræðið sé ekki einmitt best þegar framboð er af frambærilegu fólki og val félaga fari fram í kjölfarið? „Það er hins vegar rétt að ekki var spilað rétt úr stöðunni í kjölfarið og val á lista fór illa en Kristrún kom samt í gegnum þetta val.“

Þá vill Grímur meina að í Reykjavíkurkjördæmunum, hvar Samfylkingin hefur staðið sterkust, hafi samkeppnin verið gríðarlega hörð og nægi þar að nefna hinn vinsæla formann Vinstri grænna, Katrínu Jakobsdóttur, Ásmund Einar Daðason Framsóknarflokki, sem reyndist sigurvegari kosninganna, Pírata og svo 5,8 prósenta manninn hann Gunnar Smára Egilsson Sósíalistum. „Ekki hægt að horfa framhjá þessu.“

Alþingiskosningar 2021 Alþingi Samfylkingin Píratar Viðreisn

Tengdar fréttir

Ríkisstjórnin heldur og situr líklega áfram: „Eðlilegast að við setjumst niður saman“

Sigurður Ingi Jóhannsson formaður Framsóknarflokksins, sem er sigurvegari kosninganna, segist maður orða sinna. Og hann hafi sagt að ef stjórnin héldi væri eðlilegast að þau sem að henni standi tali saman. Flest bendir nú til að ríkisstjórnarsamstarfið haldi.

26. september 2021 11:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir