Innlent

Vísað út af bráðamóttöku

Eiður Þór Árnason skrifar
Lögregla á höfuðborgarsvæðinu þurfti að sinna ýmsum útköllum í gærkvöldi og í nótt.
Lögregla á höfuðborgarsvæðinu þurfti að sinna ýmsum útköllum í gærkvöldi og í nótt. Vísir/Vilhelm

Lögregla hafði afskipti af ölvuðum manni sem reyndi að komast heim til sín. Maðurinn hafði farið húsvillt og var farinn að berja húsið allt að utan til að reyna að komast inn.

Að sögn lögreglu var hann í fyrstu fluttur á lögreglustöð þar sem rétt heimilisfang var fundið og honum að því loknu ekið til síns heima. Þetta kemur fram í dagbók lögreglunnar á höfuðborgarsvæðinu en 97 mál voru skráð hjá embættinu frá klukkan 17 í gær til 5 í nótt

Lögregla skipti sér einnig af ofurölva manni í miðborg Reykjavíkur sem ætlaði að aka bifreið sinni. Vegfarendur höfðu komið í veg fyrir að maðurinn færi af stað en þegar lögregla reyndi að ræða við hann brást hann illa við og hafði í hótunum við þá. Maðurinn var handtekinn og vistaður í fangaklefa sökum hótana og ástands „þar sem hann var ekki í nokkru ástandi til að vera úti á meðal fólks,“ að sögn lögreglu.

Vísað út af bráðamóttöku

Lögregla var kölluð til í hús í Vesturbænum eftir að kona brenndist þegar heit djúpsteikingafeiti skvettist á hana. Var konan flutt með sjúkrabifreið á bráðamóttöku með brunasár.

Manni var vísað út af bráðamóttöku eftir að hann hafði verið þar til vandræða og neitað að verða við óskum starfsfólks að yfirgefa svæðið.

Kona féll á hlaupahjóli og fékk högg á höfuðið við fallið, að sögn lögreglu og var hún flutt á bráðamóttöku.

Lögregla var kölluð til eftir að 16 ára unglingur sem er sagður ofurölvi hafði dottið á höfuðið. Var hann fluttur á bráðamóttöku með sjúkrabíl.

Sex ökumenn voru stöðvaðir fyrir ölvunar- og/eða fíkniefnaakstur og farið var í yfir tíu hávaðaútköll.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.