Lífeyrissjóðir bæta við sig í Bláa lóninu og hafa trú á enn frekari vexti

Seljandi bréfanna, eins og Vísir hafði áður upplýst um, er eignarhaldsfélagið Saffron Holding sem er í eigu Sigurðar Arngrímssonar en kaupferlið hafði staðið yfir síðan í lok júní. Fyrir kaupin áttu lífeyrissjóðirnir, í gegnum samlagshlutafélagið Blávarmi, um 30 prósenta hlut í Bláa lóninu en fara núna með liðlega 36,2 prósenta hlut í þessu eina verðmætasta ferðaþjónustufyrirtæki landsins.

Samkvæmt viðskiptunum er Bláa lónið því verðmetið á samtals um 61 milljarð króna en Vísir greindi frá því 7. september síðastliðinn að lífeyrissjóðirnir hefðu náð samkomulagi um að kaupa hlut Sigurðar fyrir 25 milljónir evra.

Í tilkynningu frá stjórn Blávarma kemur fram í tilefni kaupanna að það sé mat hennar að Bláa lónið hafi tækifæri til enn frekari vaxtar í framtíðinni og verði áfram einn eftirsóttasti áfangastaður erlendra ferðamanna hér á landi.

„Það mat byggir meðal annars á sterku alþjóðlegu vörumerki sem starfsmönnum og stjórnendum Bláa Lónsins hefur tekist að byggja upp farsællega undanfarin ár. Nýafstaðin kaup Blávarma eru því staðfesting á þeirri trú sem félagið hefur á framtíð Bláa Lónsins og íslenskrar ferðaþjónustu,“ segir í tilkynningunni.

Greint frá því í lok síðasta mánaðar að Helgi Magnússon, fráfarandi stjórnarformaður Bláa lónsins og aðaleigandi útgáfufélags Fréttablaðsins, hefði selt allan sinn eignarhlut – sem jafnframt nam tæplega 6,2 prósentum – til fjárfestingafélagsins Stoða.

Samkvæmt heimildum Vísis seldi Helgi hlut sinn í Bláa lóninu til Stoða á lægra verði en í tilfelli Sigurðar en þeir hafa báðir verið í hluthafahópi fyrirtækisins í vel á annan áratug.

Sigurður, sem er fyrrverandi starfsmaður Morgan Stanley bankans í London til margra ára, er í hluthafahópi Íslenskra verðbréfa auk þess sem hann fór með fimm prósenta óbeinan eignarhlut í útgáfufélagi Fréttablaðsins, Torg, sem rekur miðla undir merkjum Fréttablaðsins, DV og Hringbrautar, undir lok síðasta árs.

Metið á 50 milljarða árið 2019

Félagið Blávarmi eignaðist fyrst 30 prósenta hlut í Bláa lóninu vorið 2019 þegar það keypti eignarhlutinn af HS Orku en í þeim viðskiptum var ferðaþjónustufyrirtækið metið á 50 milljarða króna. Í sérstöku verðmati sem Blávarmi lét gera fyrr á þessu ári, sem verðbréfafyrirtækið Arctica Finance hafði umsjón með, var Bláa lónið hins vegar verðlagt á samtals um 57 milljarða króna.

Bláa lónið tapaði 20,7 milljónum evra, jafnvirði 3,1 milljarði króna, á síðasta ári og tekjur þess drógust saman um 74 prósent frá árinu 2019 og námu samtals 32,8 milljónum evra. Eigið fé félagsins stóð í 57 milljónum evra í árslok 2020.

Stærsti hluthafi Bláa lónsins, með 39,6 prósenta hlut, verður eftir sem áður samlagshlutafélagið Hvatning. Stærsti eigandi þess með 60 prósenta hlut er eignarhaldsfélagið Kólfur, sem Grímur Sæmundsen, forstjóri Bláa lónsins fer með forræði yfir, á meðan framtakssjóður í rekstri Landsbréfa heldur hins vegar á tæplega 40 prósenta hlut.