Hlaup hafið í Vestari-Jökulsá í Skagafirði

Hallgerður Kolbrún E. Jónsdóttir og Kolbeinn Tumi Daðason skrifa 10. september 2021 16:16

Vestari-Jökulsá rennur undan Hofsjökli og niður í Skagafjörð. Vísir/Vilhelm

Hlaup er hafið í Vestari-Jökulsá í Skagafirði en upptakakvíslar hennar koma undan norðanverðum Hofsjökli. Þetta kemur fram í tilkynningu frá Lögreglunni á Norðurlandi vestra. Íbúi á Úlfsstöðum nærri Varmahlíð segist ekki muna eftir haustflóðum í sinni tíð.

Ekki er reiknað með hættu af hlaupinu en líklegt er að vatn í Héraðsvötnum fari vaxandi og að þau litist af aurburði. Þá gæti einhver brennisteinslykt fylgt hlaupinu og fólk er varað við því að dvelja við ána á meðan á hlaupinu stendur.

Áin rennur saman við Austari-Jökulsá um átta kílómetra sunnan við mynni Norðurárdals og mynda þær saman Héraðsvötn. Þjóðvegur eitt á milli Varmahlíðar og Akureyrar liggur með vötnunum á kafla.

Halldór Jóhann Einarsson, frjótæknir á Úlfsstöðum í Varmahlíð, hafði ekki heyrt tíðindin þegar fréttastofa náði af honum tali. Bær hans Úlfsstaðir eru hinum megin við Hringveginn frá Héraðsvötnum.

Hann sagði ekki að merkja aukningu í ánni enn sem komið væri. Halldór er fæddur og uppalinn á Úlfsstöðum og segir mjög sjaldgæft að flæði á haustin. Þau séu vanari flóðum á vorin í leysingum.

„Ég man ekki eftir svona haustflóðum,“ segir Halldór Jóhann.

Kolbrún Erla Grétarsdóttir, eiginkona Halldórs Jóhanns, fór í framhaldi af samtali fréttastofu við Halldór Jóhann niður að ánni. Hún segir í samtali við fréttastofu merkja breytingu á lit í ánni, hún væri orðin grá.

Skagafjörður Almannavarnir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.