Formúla 1

Corrina Schumacher: Sakna Michaels á hverjum degi

Ingvi Þór Sæmundsson skrifar
Schumacher-hjónin, Corrina og Michael.
Schumacher-hjónin, Corrina og Michael. getty/Mark Thompson

Eiginkona Michaels Schumacher, Corrina, segist sakna hans á hverjum degi. Ökuþórinn fyrrverandi hefur ekki sést opinberlega síðan hann lenti í alvarlegu skíðaslysi fyrir átta árum.

Heimildarmyndin Schumacher verður frumsýnd á Netflix í næstu viku. Þar tjáir Corrina sig um heilsu eiginmanns síns sem varð sjö sinnum heimsmeistari á ferli sínum í Formúlu 1.

Schumacher, sem er 52 ára, slasaðist alvarlega á höfði í skíðaslysi í Frakklandi í desember 2013 og var lengi í dái. Hann hefur dvalið á heimili sínu í Sviss síðan í september 2014.

„Að sjálfsögðu sakna ég Michaels á hverjum degi. En það er ekki bara ég heldur einnig börnin, faðir hans og allir í kringum hann,“ sagði Corrina. Þau Michael hafa verið gift síðan 1995 og eiga tvö börn saman. Sonur þeirra, Mick, fetaði í fótspor föður síns og keppir fyrir hönd Haas í Formúlu 1.

„Við söknum hans öll en hann er hérna. Öðruvísi, en hann er samt hérna og það styrkir okkur. Við gerum allt til að láta honum líða betur, sjá til þess að hann hafi það gott og finni fyrir tengslunum við okkur. Við reynum öll að halda áfram sem fjölskylda eins og Michael vildi.“

Schumacher hélt einkalífi sínu alltaf utan sviðsljóssins og fjölskylda hans heldur því áfram.

„Við höldum áfram. Einkalíf er einkalíf sagði hann alltaf. Það er mjög mikilvægt að hann njóti þess eins mikið og mögulegt er. Michael varði okkur alltaf og nú verjum við hann,“ sagði Corrina.

Schumacher keppti í Formúlu 1 á árunum 1991-2006 og 2010-12, fyrir Jordan, Benetton, Ferrari og Mercedes. Enginn hefur unnið heimsmeistaratitil ökuþóra oftar en hann.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.