Innlent

Segir valdarán í Samfylkingunni hafa skorið undan lýðræðinu

Árni Sæberg skrifar
Birgir Dýrfjörð segir valdarán hafa verið framið í Samfylkingunni.
Birgir Dýrfjörð segir valdarán hafa verið framið í Samfylkingunni. Samfylkingin

Birgir Dýrfjörð, stjórnarmaður í flokksstjórn og stjórn fulltrúaráðs Samfylkingarinnar í Reykjavík, segir hreinsanir á lista flokksins eftir síðustu áramót hafa valdið mestu um fylgistap Samfylkingarinnar í Reykjavík-Suður. 

Í skoðanagrein sem birtist á Vísi í morgun segir Birgir jafnframt að ekki bæti úr þegar forustufólk Samfylkingarinnar klippir eigin vængi, og svarar blákalt með hroka í fjölmiðlum, að brotthvarf Ágústar Ólafs, Jóhönnu Vigdísar og Einars Kárasonar af framboðslista skipti engu máli um fylgi flokksins.

Samkvæmt skoðanakönnun Gallup um áramótin hafi Samfylkingin í Reykjavík-Suður mælst með 22 prósent fylgi undir forystu Ágústar Ólafs og Jóhönnu Vigdísar. Hún hafi þá mælst stærsti flokkurinn.

Í dag mælist flokkurinn í Gallup könnun með 12 prósent fylgi. Það sé fjallstórt fylgishrun.

Stofnmeðlimir hyggist skila auðu

Birgir veltir því fyrir sér hvers vegna hrannist upp vitneskja um að fólk, sem tók þátt í að stofna Samfylkinguna, ætli að skila auðu þegar gengið verður til kosninga eftir þrjár vikur. Hvers vegna það fólk segist ekki geta kosið Samfylkinguna.

Hann segist telja tíu prósent samdrátt á fylgi flokksins orsakast af því sem hann kallar pólitískar hreinsanir.

„Ég hef orðið mjög var við, að skrif mín um það, sem ég kallaði hreinsanir valdaklíku í Reykjavík, hafa sáð efasemdum um heilindi klíkunnar við hagsmuni flokksins," segir Birgir.

Sagði sig úr uppstillingarnefnd

„Kunnugt er að ég sat í fjórtán manna uppstillingarnefnd, og sagði mig frá henni með bægslagangi og greinaskrifum í fjölmiðlum um það, sem ég leyfði mér að kalla pólitískar hreinsanir,“ segir Birgir.

Hann segist jafnframt hafa verið sakaður um að vilja skaða Samfylkinguna eftir að hann sagði sig úr nefndinni.

Hann gagnrýnir þá sem hann kalla „Gerandameðvirka flokkshesta“ sem að hans sögn segja ekki mega gagnrýna flokkinn heldur verði að sýna samstöðu.

„Það er rétt við eigum að standa saman, - en um hvað? Um það að virða og verja dýrmæta boðbera jafnaðarstefnunnar, - eða um það að rægja og níða flokksfólk, sem talar móti pólitískum hreinsunum, eins og ég og mikill fjöldi annarra hafa gert?“ spyr Birgir.

Segir brögð hafa verið í tafli

„Mér var þá orðið ljóst það, sem allir vita og sjá í dag, að þar var að verki fólk, sem var ákveðið í því að hreinsa efstu sætin af framboðslistanum. Það fólk sveifst einskis,“ segir Birgir um samnefndarmenn sína í uppstillingarnefndinni.

„Ráðendur í stjórn fulltrúaráðsins í Reykjavík settu það inn í verklagsreglur 14 manna uppstillingarnefndar, að ef ekki næðist einhugur um öll nöfn á framboðslistum, þá skildi uppstillingin tekin úr höndum 14 manna hópsins, og þess í stað ættu kjörnir fulltrúar í stjórn fulltrúaráðsins að ráða skipan framboðanna. Það er 7 manna hópur. Það var leynivopnið,“ segir Birgir.

Birgir segir umræddan sjö manna hóp hafa kosið um hvort Ágúst Ólafur myndi verma annað sæti listans. Fjórir fulltrúar hafi greitt atkvæði gegn því. Þetta telur Birgir vera hreint valdarán.

„Eftir situr nú sú spurning af hverju 7 manna hópurinn var látinn greiða atkvæði um Ágúst Ólaf í 2 sæti. Af hverju var 14 manna upstillingarnefndinni neitað um að greiða atkvæði um 2. sæti listans? Svarið er skýrt: Fjórmenningaklíkan vissi, að hún hafði ekki meirihluta í 14 manna nefndinni,“ segir hann.

Ætlar að skila auðu

Birgir segist hafa viðrað áhyggjur sínar af því að hreinsun listans myndi hafa slæm áhrif á fylgi flokksins.

„Svarið var lýsandi: „Hafðu ekki áhyggjur af því Birgir, það er næstum ár í kosningarnar, þá verða allir búnir að gleyma hvernig listinn varð til“,“ segir Birgir.

Hann segist hvorki geta né vilja kjósa aðra flokka og því sjái hann sér þann kost einan að sitja heima þegar þjóðin gegnur að kjörborðinu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.