Kona skölluð og henni hrint á stigaganginum

Samúel Karl Ólason skrifar 4. september 2021 07:20

Lögreglu barst tilkynningar um minnst þrjár árásir á konur í gærkvöldi og í nótt. Vísir/Vilhelm

Ráðist var á konu á stigagangi við heimili hennar í Laugardalnum skömmu eftir miðnætti í nótt. Henni var hrint og hún skölluð í andlitið svo gleraugu hennar brotnuðu og hún fékk áverka í andlitið.

Í dagbók lögreglu segir að sá sem réðst á konuna hafi síðan farið inn í aðra íbúð á stigaganginum.

Um svipað leyti handtóku lögregluþjónar mann í miðbænum sem hafði verið sakaður um að sparka í konu. Þegar verið var að ræða við manninn hrækti hann á lögregluþjóna. Maðurinn var handtekinn og vistaður í fangageymslu lögreglu vegna ástands hans og fyrir rannsókn málsins.

Fyrr um kvöldið, eða klukkan rúmlega níu, barst tilkynning um að kona hefði verið slegin í andlitið á veitingahúsi í miðbænum.

Minnst ein tilkynning um líkamsárás barst til viðbótar til lögreglu í nótt. Í það skipti var ráðist á ölvaðan mann fyrir utan veitingahús í miðbænum. Maðurinn fékk skurð fyrir neðan auka eftir árásina en árásaraðilar voru farnir þegar lögregluþjóna bar að garði.

Maðurinn fékk aðhlynningu frá sjúkraflutningamönnum.

Í dagbók lögreglu segir einnig að tilkynnt hafi verið um þjófnað í gær þar sem farið var inn í ólæstan bíl og verðmætum stolið þaðan. Eigandi bílsins hafði séð tvö menn sem fóru inn í bílinn keyra á brott.

Minnst tveir ökumenn voru stöðvaðir í nótt og eru grunaðir um akstur undir áhrifum bæði áfengis og fíkniefna. Báðir voru sömuleiðis ekki með ökuréttindi og annar þeirra var ljóslaus.

Lögreglumál Reykjavík Næturlíf

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.