Arnar Þór: Erum rosalega spenntir fyrir þessum hópi

Leikurinn í kvöld er fyrsti heimaleikur Íslendinga í undankeppni HM 2022. Ísland er í 5. sæti J-riðils undankeppninnar með þrjú stig eftir þrjá leiki.

Ísland mætir Rúmeníu í kvöld, Norður-Makedóníu á sunnudaginn og Þýskalandi á miðvikudaginn. Leikirnir hafa þó eðlilega fallið í skuggann af atburðum síðustu daga.

Á blaðamannafundi á þriðjudaginn sagði Arnar Þór að hann gæti ekki gert kröfu á hámarks árangur í leikjunum þremur og hann færi aðallega fram á að menn stæðu saman og leggðu sig alla fram.

„Það sem ég sagði stendur enn en það er samt þannig að maður þarf að finna réttu leiðina að ná leikmönnum í rétt spennustig og rétta einbeitingu. Auðvitað viljum við vinna leikinn en við reynum að einblína á af hverju við erum hérna. Og við erum hérna af því okkur finnst þetta ógeðslega skemmtilegt, að spila fótbolta. Þetta er vinnan þeirra og vinnan mín og ég þarf að sinna henni af bestu getu eins og þeir,“ sagði Arnar Þór í samtali við Svövu Kristínu Grétarsdóttur.

Landsliðshópur Íslands er talsvert yngri en undanfarin ár og Arnar Þór segir mikið spunnið í yngri leikmenn liðsins.

„Við erum rosalega spenntir fyrir þessum hópi því það eru rosalega margir ungir og efnilegir leikmenn í honum. Þetta er lið í þróun og þegar við tókum við vissum við að þetta yrði erfitt en við gátum ekki spáð fyrir um hvar við erum akkúrat núna. En þetta eru strákar sem ég hef rosalega mikla trú á, hvort sem þeir eru átján ára eða 38 ára,“ sagði Arnar Þór. 

„Við gerum kröfu til sjálfs okkar, sem leikmenn og þjálfarar, að gefa allt sem við eigum inni á vellinum og við viljum vinna. En við erum að þróa nýtt lið. Við vitum að Kári Árnason er ekki að fara að spila næstu þrjú ár þannig við þurfum að vera tilbúnir með næstu leikmenn og þessir ungu verða einhvern tímann að fá leiki og mínútur til að geta tekið skref fram á við, alveg eins og fyrri kynslóðir hafa gert.“

Leikur Íslands og Rúmeníu hefst klukkan 18:45 í kvöld og verður í beinni textalýsingu á Vísi.