Sport

Engin formleg tillaga um aukaþing borin upp á fundi stjórnar

Kolbeinn Tumi Daðason skrifar
Stjórn KSÍ ætlar að sitja fram að næsta ársþingi í febrúar. Áður en Guðni sagði af sér voru 15 karlar í stjórn KSÍ og tvær konur.
Stjórn KSÍ ætlar að sitja fram að næsta ársþingi í febrúar. Áður en Guðni sagði af sér voru 15 karlar í stjórn KSÍ og tvær konur. KSÍ

Stjórn KSÍ ætlar að sitja fram að næsta ársþingi sem fram fer í febrúar. Þó var rætt á fundi stjórnarinnar um helgina að boða til aukaþings þar sem kosin yrði ný stjórn. Þetta herma heimildir fréttastofu.

Stjórn KSÍ fundaði bæði á laugardag og sunnudag í kjölfar þess að ung kona steig fram í viðtali og lýsti því að leikmaður, sem hefði beitt hana kynferðislegu ofbeldi, hefði viðurkennt brot sitt og greitt henni skaðabætur. Unga konan steig fram ósátt við að Guðni Bergsson, formaður KSÍ, sagði í Kastljósi á fimmtudag að engin kynferðisofbeldismál hefðu komið á borð sambandsins með formlegum hætti.

Guðni sagði daginn eftir að hann hefði misminnt og talið að um ofbeldismál væri að ræða.

Hávær krafa hefur verið um breytingar hjá KSÍ í kjölfar þessa og fór svo að Guðni Bergsson, formaður KSÍ, sagði af sér í gær. Enn er ákall um breytingar og margir sem telja ekki næga breytingu að einn aðili taki skellinn.

„Þetta er vissulega byrjun. En það er ekki hægt að setja nauðgunarmenninguna og gerendameðvirknina sem ríkir innan KSÍ á einn mann. Það þarf nýja stjórn ekki bara nýjan formann,“ sagði Þórhildur Gyða Arnarsdóttir, unga konan, á Twitter í gærkvöldi. Fleiri tóku undir.

Umræðan tekin en engin tillaga borin upp

Fram kom í fréttum í gær að tillaga hefði verið borin upp á stjórnarfundi um að boða til aukaþings KSÍ þar sem ný stjórn yrði kosin. Samkvæmt heimildum fréttastofu var það ekki alveg rétt. Engin formleg tillaga var borin upp en umræðan var þó tekin á fundi stjórnarinnar.

Niðurstaða stjórnarinnar hafi verið sú að sitja áfram til ársþingsins í febrúar. Til aukaþings þarf að boða með mánaðarfyrirvara og því komið fram í október þegar slíkt þing færi fram og fjórir mánuðir í hefðbundið ársþing.

Borghildur Sigurðardóttir, varaformaður KSÍ og nú settur formaður ásamt Gísla Gíslasyni, sagði í Bítinu í morgun að hún væri meðvituð um skoðun margra á því að stjórnin ætti að víkja. Hún hefði sjálf velt því fyrir sér. Gísli sagði það sama í viðtali við Stöð 2 í gær.

Borghildur taldi að ekki hefði verið möguleiki á að allir myndu stíga frá borði og skilja allt eftir óstarfhæft.

Viðtalið í heild má heyra að neðan.


Tengdar fréttir

Hetjur innan vallar en víða pottur brotinn utan vallar

Þeir sameinuðu íslensku þjóðina með góðu gengi sem náði hápunkti á Evrópumótinu í Frakklandi 2016 og vöktu athygli um allan heim fyrir árangur sinn. Á þeim fimm árum sem hafa síðan liðið hefur hver hrollvekjusagan af landsliðsmönnum Íslands í knattspyrnu farið sem eldur í sinu um samfélagið, ýmist í formi óstaðfestra eða staðfestra sagna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.