Viðar Örn og Viðar Ari skoruðu í jafntefum - Alfons og félagar með stórsigur

Amahl William Pellegrino skoraði öll þrjú mörk Bodø/Glimt þegar liðið vann 3-0 sigur gegn Kristiansund. Alfons og félagar hans í Bodø/Glimt sitja í öðru sæti deildarinnar með 31 stig eftir 16 leiki, en Kristiansund er fimm stigum á eftir þeim í fjórða sæti.

Viðar Örn Kjartansson kom Vålerenga yfir gegn Samúel Friðjónssyni og félökum hans í Viking strax á elleftu mínútu og staðan var 1-0 þegar flautað var til hálfleiks.

Það var ekki fyrr en að fimm mínútur voru til leiksloka að Viking náði að jafna metin, en þar var á ferðinni Harald Nilsen Tangen.

Lokatölur 1-1 og Vålerenga situr í sjöunda sæti með 23 stig, einu sæti og tveim stigum á eftir Samúel og félögum í Viking.

Í hinum Íslendingaslagnum mættust Viðar Ari Jónsson og félagar í Sandefjord og Adam Örn Arnarson og félagar í Tromso. Viðar Ari var í byrjunarliði Sandefjord, en Adam Örn kom inn af varamannabekk Tromso.

Viðar Ari kom Sandefjord yfir eftir tólf mínútna leik, en Moses Ebiye jafnaði metin fimm mínútum síðar. Sivert Gussias hefði getað stolið sigrinum fyrir Sandefjord á lokamínútu leiksins, en hann lét verja frá sér vítaspyrnu.

Sandefjord er í ellefta sæti deildarinnar með 21 stig, en Tromso er tveimur sætum neðar með 15 stig.

Fjórði leikur dagsins var svo viðureign Haugesund og Lillestrom þar sem að þeir síðarnefndu unnu góðan 3-0 sigur og lyftu sér þar með upp í þriðja sæti deildarinnar.