Veiði

Rangárnar standa upp úr í sumar

Karl Lúðvíksson skrifar
Nýgengin lax úr Eystri Rangá
Nýgengin lax úr Eystri Rangá Mynd: KL

Þegar listinn yfir aflahæstu árnar er skoðaður standa Rangárnar upp úr í sumar og líklega fara þær báðar yfir 3.000 laxa

Eystri Rangá er á toppnum með 1.873 laxa en vikuveiðin þar var 268 laxar. Það skrítna ástand hefur verið við ánna undanfarna daga og vikur að hún er líklega eins tær og hún getur verið því það kemur lítil sem engin bráð í hana. Þá verður hún köld og fiskurinn oft tregur í töku. Um leið og hún litast aðeins af jökulbráð og fær á sig smá mjólkurlit verður hún aðeins hlýrri og þá fer laxinn oftar en ekki að taka betur.

Það er ágætt magn af laxi í ánni þó það sé ekkert miðað við árið í fyrra en það er líklega ekki sanngjarnt að bera það saman þar sem um metár var að ræða. Flest svæðin eru inni og mikið af laxi í nokkrum hyljum eins og Moldarhyl, Skollatanga, Bátsvaði, Hofteigsbreiðum, Þreytanda og Hrafnaklettum. Rangárvað og veiðistaðirnir á svæði 6 eru ótrúlega rólegir en það var þannig líka í fyrra þangað til leið á september, þá fylltist vaðið af laxi.

Ytri Rangá átti frábæra viku en það veiddust 382 laxar í henni og það var greinilegt að það hafði komið inn stór síðsumars ganga í ánna. Heildarveiðin í Ytri Rangá í fyrra var 2.642 laxar og við spáum því að áinn ekki bara fari yfir 3.000 laxa heldur gæti hún átt það mikið inni í september og október að hún teygi sig langt í 4.000 laxa. Það sama á við um Eystri ánna. Það er nokkuð ljóst að þær systur eiga þetta sumar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.