Signý Sif tekur við af Sigfúsi hjá Eyri Invest

Atli Ísleifsson skrifar 12. ágúst 2021 07:16

Signý Sif Sigurðardóttir og Sigfús Oddsson. Eyrir Invest

Signý Sif Sigurðardóttir hefur verið ráðin framkvæmdastjóri fjármögnunar hjá Eyri Invest hf. Sigfús Oddsson, sem sinnt hefur starfinu frá 2011 hefur ákveðið að láta af störfum.

Frá þessu segir í tilkynningu frá Eyri Invest. Fram kemur að Signý sé með MS gráðu í aðgerðarannsóknum frá Columbia háskóla í New York og hafi starfað hjá Landsvirkjun síðustu sex ár, síðast sem forstöðumaður fjárstýringar.

„Sem forstöðumaður bar hún m.a. ábyrgð á fjármögnun og fjárhagslegri áhættustýringu Landsvirkjunar. Þá var Signý einnig í fararbroddi í útgáfu grænna skuldabréfa Landsvirkjunar, sem var fyrsti útgefandi slíkra skuldabréfa á Íslandi.

Signý mun hefja störf í lok ágúst,“ segir í tilkynningunni.

Hrund og Stefán Árni ný inn

Ennfremur segir frá því að á aðalfundi Eyris Invest hafi Hrund Gunnsteinsdóttir og Stefán Árni Auðólfsson komið ný inn í stjórn.

„Hrund er framkvæmdastjóri Festu, miðstöðvar um samfélagsábyrgð og sjálfbærni. Hún er jafnframt ein af stofnendum Nordic Circular Hotspot sem stuðlar að framgangi hringrásarhagkerfisins á Norðurlöndunum. Stefán Árni er meðeigandi á lögfræðistofunni LMG og hefur setið í stjórnum nokkurra skráðra hlutafélaga á Íslandi.

Eyrir Invest hf. er fjárfestingarfélag í eigu fagfjárfesta og einstaklinga. Eyrir er stærsti hluthafi Marel hf. en á auk þess kjölfestuhlut í Eyri Sprotum og Eyri Vexti sem fjárfesta í sprota- og vaxtarfyrirtækjum. Þeim sjóðum er stýrt af Eyri Venture Management sem er dótturfélag Eyris Invest.“

Vistaskipti

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.