Viðskipti

Ráðinn yfir­maður talna­greiningar hjá Kviku

Atli Ísleifsson skrifar
Birgir Örn Arnarson.
Birgir Örn Arnarson. kvika

Birgir Örn Arnarson hefur verið ráðinn yfirmaður talnagreiningar Kviku og hefur hann formlega störf í byrjun ágúst næstkomandi.

Í tilkynningu frá bankanum segir að undanfarnar vikur hafi hann verið bankanum til ráðgjafar vegna stefnumótunar í fjártækni.

„Um er að ræða nýtt starf sem verður til vegna aukinna umsvifa og mikillar fjölgunar viðskiptavina samstæðu Kviku í kjölfar samruna bankans við TM og Lykil sem og kaupum á fjártæknifélögunum Aur og Netgíró. Birgir mun starfa á skrifstofu forstjóra og hafa yfirumsjón með greiningu tölulegra gagna og gerð gervigreindarlíkana, með það að markmiði að efla tekjustýringu, áhættustýringu og markaðsstarf innan samstæðunnar.

Síðastliðin sjö ár hefur Birgir búið í Lúxemborg og starfað sem yfirmaður hjá alþjóðlega greiðsluþjónustufyrirtækinu PayPal. Undanfarin tvö ár hefur hann gegnt stöðu framkvæmdastjóra áhættustýringar og greiningar í fjárstýringu PayPal samstæðunnar (e. Global head of Risk and Analytics, Treasury), en þar áður var hann yfirmaður áhættustýringar PayPal Europe.

Birgir er með doktorspróf í kennilegri og hagnýtri aflfræði frá Cornell háskólanum í Bandaríkjunum,“ segir í tilkynningunni.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×