Viðskipti innlent

Skraut­legri sögu fé­lags for­stöðu­manns Zu­ism lokið

Kjartan Kjartansson skrifar
RH16 ehf. var undir lokin skráð til heimilis að Borgartúni 22 þar sem Ágúst Arnar leigði litla skrifstofu af Flugvirkjafélagi Íslands. Aðalfundur Zuism var sagður hafa farið fram í húsakynnunum í september árið 2018. Ekki er ljóst hvort að sá fundur fór raunverulega fram.
RH16 ehf. var undir lokin skráð til heimilis að Borgartúni 22 þar sem Ágúst Arnar leigði litla skrifstofu af Flugvirkjafélagi Íslands. Aðalfundur Zuism var sagður hafa farið fram í húsakynnunum í september árið 2018. Ekki er ljóst hvort að sá fundur fór raunverulega fram. Vísir/Vilhelm

Einkahlutafélagið RH16 sem var í eigu Ágústs Arnars Ágústssonar, forstöðumanns trúfélagsins Zuism, hefur verið úrskurðað gjaldþrota. Það var meðal annars notað til að taka á móti fjármunum sem Ágúst Arnar er sakaður um að hafa tekið sér úr sjóðum félagsins,

Héraðsdómur Reykjaness úrskurðaði félagið gjaldþrota 14. maí, að því er sagði í tilkynningu í Lögbirtingablaðinu. DV sagði fyrst frá gjaldþrotinu. Félagið kom meðal annars við sögu í umdeildri Kickstarter-söfnun sem var stöðvuð og meintum viðskiptum við kínverskt stórfyrirtæki.

RH16 ehf. var alfarið í eigu Ágústs Arnar. Í ákæru héraðssaksóknara á hendur honum og bróður hans Einars vegna fjársvika og peningaþvættis í tengslum við Zuism kom fram að þeir hefðu fært 750.000 krónur beint og óbeint úr sjóðum trúfélagsins inn á reikning RH16. Bræðurnir eru sakaðir um að hafa ráðstafað fjármunum trúfélagsins, sem þáði tugi milljóna króna frá ríkinu í formi sóknargjalda, í eigin þágu. Þeir hafi eytt milljónum króna í veitingahús, áfengi og ferðalög.

Aðeins 1,27 milljónir króna voru eftir á reikningi Zuism af þeim rúmlega 84,7 milljónum sem félagið fékk frá ríkinu í maí árið 2019 en héraðssaksóknari krefst upptöku á hátt í fimmtíu milljónum króna hjá félögum Einars Ágústssonar og Zuism.

Kickstarter-söfnun og meint viðskipti við kinverskt stórfyrirtæki

Félag Ágústs Arnars sem nú er gjaldþrota átti sér skrautlega sögu. Það hét áður Janulus ehf. og var á sínum tíma skráð fyrir söfnun bræðranna fyrir svonefndri Trinity-vindmyllu á bandarísku fjáröflunarsíðunni Kickstarter. Bræðurnir voru gjarnan kenndi við Kickstarter í fjölmiðlum á þeim tíma.

Kickstarter stöðvaði söfnun bræðranna fyrir þegar þeir höfðu safnað tæpum tuttugu milljónum króna árið 2015. Þá höfðu þeir verið til rannsóknar um tíma vegna meintra fjársvika. Í skriflegu svari Kickstarter til Vísis í nóvember árið 2018 kom fram að fyrirtækið gæti ekki tjáð sig um ástæður þess að söfnuninni var lokað vegna þess að það hefði unnið með „löggæsluyfirvöldum“ vegna verkefna bræðranna.

Árið 2018, eftir að Ágúst Arnar tók við stjórnartaumum í Zuism, var umsókn hans fyrir hönd félagsins um hátt í einnar og hálfrar milljónar króna styrk úr Tækniþróunarsjóði Rannís samþykkt. Þá hafði hann breytt nafni félagsins í RH16. Styrkurinn var vegna sólarselluverkefnis.

Í maí sama ár sagði Ágúst Arnar Morgunblaðinu að kínverska fyrirtækið Goldwind hefði keypt hugverkarétt að Trinity-vindmyllunni sem þeir bræður söfnuðu fyrir á Kickstarter á sínum tíma. Goldwind ætlaði sér að setja Trinity á markað í Kína og RH16 ætti að veita ráðgjöf við verkefnið.

Talskona Goldwind vísaði því á bug að fyrirtækið hefði átt í viðskiptum, samstarfi eða samskiptum við RH16 þegar Vísir spurðist fyrir um fréttina í desember 2018. Í yfirlýsingu sem Ágúst Arnar sendi frá sér eftir að frétt Vísis birtist hélt hann því engu að síður áfram fram að hann hafi átt í viðskiptum við fulltrúa Goldwind. Því hafnaði talskona Goldwind aftur þegar Vísir bar þær fullyrðingar undir hana.


Tengdar fréttir

Frávísunarkröfu Zuism-bræðra hafnað

Kröfu forsvarsmanna trúfélagsins Zuism um að ákæru á hendur þeim og félaginu yrði vísað frá var hafnað í Héraðsdómi Reykjavíkur í morgun. Mennirnir eru ákærðir fyrir fjársvik og peningaþvætti.

Saksóknari fann fleiri milljónir Zuism-bræðra í Bandaríkjunum

Héraðssaksóknari hefur gert þá kröfu að fleiri eignir Einars Ágústssonar, annars fyrirsvarsmanna trúfélagsins Zuism, verði gerðar upptækar. Um er að ræða allar eignir Einars á reikningum hjá breska verðbréfafyrirtækinu Interactive Brokers í London. Um er að ræða samanlagt rúmlega 16 þúsund dollara eða andvirði rúmlega tveggja milljóna íslenskra króna.

Zuism nýtti sér þekkta veikleika á lögum um trúfélög

Ríkislögreglustjóri varaði við því að ófullnægjandi lög um trú- og lífsskoðunarfélög sköpuðu hættu á að þau væru misnotuð í þágu brotastarfsemi meira en ári áður en stjórnendur Zuism voru ákærðir fyrir fjársvik og peningaþvætti.

Stjórnendur Zuism ákærðir fyrir fjársvik og peningaþvætti

Tveir bræður sem stýra trúfélaginu Zuism hafa verið ákærðir fyrir fjársvik og peningaþvætti. Trúfélagið var á tímabili eitt það fjölmennasta á landinu og hefur þegið tugi milljóna króna úr ríkissjóði í formi sóknargjalda.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×