Viðskipti erlent

Shell dæmt til að draga hressi­lega úr út­blæstri

Atli Ísleifsson skrifar
Shell hafði áður sagst stefna að því að verða kolefnishlutlaust fyrir árið 2050.
Shell hafði áður sagst stefna að því að verða kolefnishlutlaust fyrir árið 2050. EPA

Dómstóll í Haag í Hollandi dæmdi í dag hollenska olíurisann Shell til að draga verulega úr útblæstri sínum á gróðurhúsalofttegundum. Shell á samkvæmt dómunum að draga úr útblæstri félagsins um 45 prósent fyrir árið 2030, miðað við útblástur árið 2019.

Dómsins hefur beðið með mikilli eftirvæntingu, en hollenskir fjölmiðlar segja þetta vera í fyrsta sinn í sögunni sem olíufélag hefur verið dæmt til að draga úr útblæstri sínum. Shell á möguleika á að áfrýja dómnum.

Málið má rekja til þess að sjö umhverfisverndarsamtök, þeirra á meðal Friends of the Earth og Milieudefensie, auk 17 þúsund einstaklinga, stefndu Shell árið 2019.

Í dómnum er vísað í Parísarsáttmálann þar sem tvö hundruð ríki hafa skuldbundið sig til að koma í veg fyrir hlýnun á jörðinni með því að draga úr útblæstri gróðurhúsalofttegunda.

BBC segir frá því að fjöldi umhverfisverndarsamtaka víðs vegar um heim hafi stefnt stórfyrirtækjum og leitað til dómstóla til að draga úr losun.

Shell hafði áður sagst stefna að því að verða kolefnishlutlaust fyrir árið 2050.

Holland Bensín og olía Loftslagsmál


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið