Atvinnulíf

Eiginmaðurinn sér um fréttavaktina á morgnana

Rakel Sveinsdóttir skrifar
Gunnur Líf Gunnarsdóttir.
Gunnur Líf Gunnarsdóttir. Vísir/Vilhelm

Gunnur Líf Gunnarsdóttir, framkvæmdastjóri mannauðssviðs Samkaupa, segir eiginmanninn sjá um fréttavaktina fyrir þau hjónin alla morgna en þá gefur hann henni skýrslu um allt það helsta sem fjölmiðlarnir eru að fjalla um. Gunnur hefur lagt hlaupaskónna á hilluna en ætlar að vinna eiginmanninn í tennis í sumar. Hún segir Dagatalið og Outlook algjöra líflínu í skipulagi. Það á við um verkefnin í vinnunni, heima fyrir og já, líka tengt börnunum.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Fleiri daga en færri í vikunni, vakna ég á undan öllum nágrönnunum, hundinum og eiginmanninum, eða um hálf sex.

Hálfsofandi skunda ég frá Garðabænum og niður í World Class Laugum þar sem ég æfi með einni af minni bestu vinkonu, svo það er ekki bara hreyfingin sem er nærandi heldur lika spjallið sem ég næ við æfingarfélagana eldsnemma á morgnanna áður en vinnudagurinn byrjar.

Þá morgna sem ég æfi ekki eldsnemma, er ég nú yfirleitt komin á fætur ekki mikið seinna en sjö.“

Hvað er það fyrsta sem þú gerir á morgnana?

„Eftir hreyfingu, World Class eða morgungöngu með hundinn, er heilagur tími með kaffibollanum og stöðufund með eiginmanninum. 

Eiginmaðurinn er yfirleitt búinn að skanna fréttamiðlana og gefur mér rapport á það helsta sem skiptir máli og því óþarfi fyrir mig að kíkja á nokkurn miðil fyrr en um hádegi. 

En svo er líka farið yfir skipulag dagsins, hvort sem það er dagskrá barnanna, skutlið, kvöldmaturinn eða annað sem mögulega er á dagskrá þann daginn. 

Hann er svo farinn á undan í vinnu og næ ég þá smá tíma með börnunum áður en þau fara í skóla, en sá tími er varið mjög misjafnlega; allt frá því að hlusta á píanóleik dótturinnar í að horfa á nýjast Minecraft videóið á youtube með syninum.“

Ertu enn alltaf á hlaupum?

„Það fer allt eftir því hvernig þú lítur á spurninguna. Ef þú spyrð fólkið í kringum mig þá er ég alltaf á hlaupum, frá einum stað og á annan með nóg af boltum í fanginu. En hvað formlegu hlaupin varða, þá hafa þeir hlaupaskór verið settir til hliðar þar sem göngutúrar með hundinn hafa meira tekið við.

Þá höfum við hjónin nýverið tekið upp að spila tennis sem innheldur reyndar alveg furðulega mikil hlaup og stefnum við á kepppni í tvíliðaleik í sumar og auðvita að spila í sólinni á Spáni við fyrsta tækifæri. 

En ég tók upp á því að skrá mig í aukakennslu í sumar, svona til að vera viss um að ná að vinna eiginmanninn við tækifæri, sem er ennþá talsvert betri en ég.“

Gunnur segist hafa lagt hlaupaskónna á hilluna en að fara út að ganga með hundinn hafi frekar tekið við. Heimilistíkin Ronja tók ekki annað í mál en að fá að vera með í myndatöku.Vísir/Vilhelm

Í hvaða verkefni ertu að vinna helst í þessa dagana?

„Verkefnin eru mjög fjölbreytt þessa dagana og eru mörg þeirra annaðhvort á upphafsstigum eða á lokametrunum. Mér finnst upphaf sumar góður tími til að fara yfir liðinn vetur, hvað gekk vel hjá okkur og ígrunda vel áherslunar fyrir komandi vetur. Sumarið er góður tími til að skipuleggja og kafa dýpra í ákveðin verkefni. 

Ég hef lagt mikla áherslu á fræðslu og menntamál hjá Samkaupum og nýverið settum við að af stað stjórnendanám sem hefur haft hug minn alla síðustu misseri í samstarfi við Háskólann á Bifröst. Ég hlakka mikið til að fylgja því eftir í sumar og hitta hópinn uppfullan af hugmyndum í ágúst. 

Þá höfum við einnig verið að að setja áherslu á jafnréttismál í víðara samhengi, þar sem við erum að fara inn í samstarf við Mirru fræðslusetur sem leggur áherslu á erlenda starfsmenn á Íslandi og svo Samtökin ´78 til að opna á jafnrétti allra og fordómalaust umhverfi innan Samkaupa.“

Hvernig skipuleggur þú þig í vinnu?

„Dagatalið og Outlook er algjör líflína í vinnunni og raun í heimilslífinu líka. Þar skrái ég allt niður, í ákveðnum litakóðum eftir verkefnum, já eða börnum.

Ég nota svo ipadinn daglega, þar sem verkefnalisti dagsins er settur niður en hann samþættist við outlook, þannig að það er auðvelt að skrá verkefnin fram í tímann og vera alltaf með uppfærðan lista.

Ég passa að reyna að taka frá tíma alla daga, til að fara yfir verkefnalistann, skoða dagatalið og klára tölvupóstinn fyrir næsta dag. Tek frá tíma til að fókusa og passa að ofbóka mig ekki. Þó sumir myndu reyndar segja að það gangi misvel hjá mér, því dagatalið er yfirleitt þéttsetið allt að fjórum vikum fram í tímann.“

Hvenær ferðu að sofa á kvöldin?

„Ég vil trúa því að ég sé alltaf sofnuð um tíu leytið en þegar líður á vor og sumar, þá er eins og eitthvað breytist og færist þessi tími nær miðnætti. Mér finnst voða gott að enda daginn á einum þætti, sem geta stundum orðið fleiri en einn ef þeir eru spennandi og með því raskast aðeins þessi tími sem ég fer að sofa.“


Tengdar fréttir

Byrjar daginn á því að leita að fuglum og köttum

Það kann að hljóma furðulega að Halldór Benjamín Þorbergsson, framkvæmdastjóri Samtaka atvinnulífsins, byrji daginn á því að leita að fuglum og köttum. Skýringin er reyndar einföld því morgunrútínu Halldórs er meðal annars stjórnað af yngstu dóttur hans, sem vekur pabba sinn hispurslaust klukkan hálfsjö. Halldór átti sér stóra drauma þegar hann var lítill. Til dæmis að verða tígrisdýr. Í dag eru það hins vegar hjól atvinnulífsins í kjölfar Covid og bólusetninga sem Halldór er með hugann við og í skipulagi heldur hann trygglyndi við Outlook dagatalið.

Rifjar upp prins Valíant og gírar sig í gleðigírinn alla morgna

Sigrún Hildur Jónsdóttir, framkvæmdastjóri kúnnagleði og meðstofnandi Klappir, lifði sig inn í ævintýri prins Valíant þegar að hún var lítil og fannst gaman að tálga örvar með pabba sínum. Sigrún Hildur leggur sérstaka áherslu á það alla morgna, að gíra sig inn í gleði og jákvæðni, sem hún segir mjög mikilvægt til þess að mæta rétt innstilltur til vinnu.

Eitt sinn alltaf dragúldinn á morgnana, sérstaklega á mánudögum

Þórarinn Ævarsson segist ekki vita hvort hann eigi að titla sig sem framkvæmdastjóri, pizzubakara eða Spaðakónginn því allir eiga þessir titlar við. Þórarinn er fréttafíkill sem eitt sinn vaknaði alltaf sem dragúldinn B-týpa á morgnana. En nú er öldin önnur því í dag vaknar Þórarinn um áttaleytið  og sendir uppúr því lykilstarfsmönnum sínum hrós og ábendingar. 

Sálin hans Jóns míns vinsælust og stjórnaði sjálf diskótekunum

Auður Lilja Davíðsdóttir, framkvæmdastjóri Sölusviðs Öryggismiðstöðvarinnar, myndi treysta sér til þess að keppa á stórmóti í skipulagningu, svo skipulögð er hún. Á morgnana stýrist fatavalið meðal annars af því hvað ljúfa röddin í símaappi eiginmannsins segir en frá unglingsárunum er það Sálin hans Jóns míns sem stendur upp úr.

Íþróttanördinn í Landsbjörg viðurkennir stríðni barna sinna

Nýr framkvæmdastjóri Slysavarnafélagsins Landsbjörg, Kristján Harðarson, viðurkennir að hann sé algjör alæta á íþróttir. Svo mikill íþróttanörd er hann reyndar, að börnin gera að honum smá grín. Kristján skipuleggur verkefnin sín í lok hverrar vinnuviku en þessa dagana er annasamt í vinnunni; Ekki síst vegna eldgossins í Fagradalsfjalli.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.