Viðskipti innlent

Verð­­launuðu greiningar­búnað fyrir höfuð­högg

Eiður Þór Árnason skrifar
Vinningsteymið hyggst halda áfram að vinna að verkefninu.
Vinningsteymið hyggst halda áfram að vinna að verkefninu. HR

Seifer, greiningarbúnaður fyrir höfuðhögg íþróttafólks hlaut á dögunum Guðfinnuverðlaunin 2021. Búnaðurinn inniheldur hreyfi- og hröðunarnema sem mæla meðal annars höggkraft, hröðun og horntíðni höfuðhöggs.

Eru upplýsingar úr nemunum notaðar til að meta alvarleika höggsins ásamt því að flýta greiningu á mögulegum heilahristingi. 

Hugmyndin var þróuð af nemendum við Háskólann í Reykjavík sem hluti af nýsköpunarátaki í námskeiðinu Nýsköpun og stofnun fyrirtækja. Nemendahópar keppa sín á milli um best útfærðu hugmyndina sem hlýtur Guðfinnuverðlaunin en í ár varð verkefnið SEIFER hlutskarpast. Þetta kemur fram í tilkynningu frá Háskólanum í Reykjavík.

Vinningsteymið er skipað Bjarka Fannari Snorrasyni, Bríeti Evu Gísladóttur, Davíð Anderssyni og Guðrúnu Ingu Marinósdóttur. Telja þau að með auðveldari greiningu geti íþróttamaður sem verður fyrir heilahristingi hafið bataferli strax og þannig minnkað líkur á langvarandi afleiðingum.

2. sæti: Help!

„Help! er nýtt og betra bjöllukerfi fyrir heilbrigðisstofnanir sem kemur í veg fyrir að önnum kafið starfsfólk þurfi að svara beiðnum sjúklinga án þess að vita hvers eðlis aðstoðarbeiðnin er.

Með Help! hugbúnaðinum geta sjúklingar kallað eftir nákvæmlega þeirri aðstoð sem þeir þurfa og starfsfólk veit hvað á að mæta með á vettvang, hversu áríðandi verkið er og hversu mikið vinnuafl þarf. Help! er einfalt og hentar öllum aldurshópum,“ segir í lýsingu þróunarteymisins. Því tilheyrðu Ásgeir Örn Jóhannsson, Ólafur Þorsteinn Skúlason, Óliver Haraldsson, Sigríður Þórunn Ragnarsdóttir og Unnur Ósk Gunnlaugsdóttir.

3. sæti: VÆR

„VÆR er kolsýrður drykkur með náttúrlegum bragðefnum og CBD olíu. CBD er eitt af virku efnunum í hamp plöntunni , en er ekki vímugjafi, heldur bætir heilsu. Varan er fyrir fólk á aldrinum 25-50 ára, íþróttafólk, fólk sem upplifir streitu og kvíða og fyrir fólk með ADHD.“

Að baki VÆR standa Axel Aage Schiöth, Birgir Snævarr Ásþórsson, Harpa Ægisdóttir og Heiðar Sigurjónsson.

Allir hóparnir þrír hafa í hyggju að vinna áfram að sínum verkefnum.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×