Heimsmarkmiðin

Veðurhamfarir hrekja flesta á flótta innan eigin lands

Heimsljós
Ljósmynd frá Bangladess
Ljósmynd frá Bangladess WFP

Átök og náttúruhamfarir leiddu til þess að einhver neyddist til að flýja innan eigin lands á hverri sekúndu á síðasta ári.

Á síðasta ári hröktu veðurhamfarir fleiri á flótta innan eigin lands en stríðsátök, segir í nýrri árlegri skýrslu stofnunar - Internal Displacement Monitoring Centre (IDMC) - sem vaktar þá sem lenda á vergangi. Átök og náttúruhamfarir leiddu til þess að einhver neyddist til að flýja innan eigin lands á hverri sekúndu á síðasta ári, eða fleiri en nokkru sinni fyrr.

Heimsfaraldur kórónuveirunnar leiddi til takmarkana á ferðum fólks hvarvetna í heiminum og því var reiknað með fækkun þeirra sem væru á hrakhólum innan lands. Annað kom hins vegar á daginn og árið markaðist af miklu óveðri, áframhaldandi ófriði og öldu ofbeldis. Alls þurftu 40,5 milljónir manna að flýja innan eigin lands á síðasta ári.

Samkvæmt skýrslunni hafa þeir sem nýlega hafa lent á vergangi ekki verið fleiri síðustu tíu árin. Fólk á vergangi innan eigin lands er nú um 55 milljónir talsins, eða rúmlega tvöfalt fleiri en þeir 26 milljónir flóttamanna sem farið hafa yfir landamæri.

Flestir, þrír af hverjum fjórum, flúðu veðurhamfarir eins og flóð, storma og skógarelda. „Við getum aðeins reiknað með því að loftslagsbreytingar færist í aukana og það verði því áframhaldandi fjölgun meðal þeirra sem lenda á hrakhólum innan eigin lands,“ segir Alexandra Bilak framkvæmdastjóri IDMC.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.