Viðskipti innlent

Leyfi í höfn hjá Play og fyrsta flugvélin á leið til landsins

Kolbeinn Tumi Daðason skrifar
Frá vinstri til hægri má sjá Halldór Guðfinnsson, Andra Geir Eyjólfsson og Friðrik Ottesen en þeir tóku við flugvélinni og undirbúa fyrir fyrsta flug. Halldór og Friðrik eru flugstjórar en Andri Geir er forstöðumaður tæknideildar Play.
Frá vinstri til hægri má sjá Halldór Guðfinnsson, Andra Geir Eyjólfsson og Friðrik Ottesen en þeir tóku við flugvélinni og undirbúa fyrir fyrsta flug. Halldór og Friðrik eru flugstjórar en Andri Geir er forstöðumaður tæknideildar Play. Play

Flugfélagið Play hefur fengið flugrekstrarleyfi frá Samgöngustofu. Fyrsta flugvélin var afhent í Houston Texas í Bandaríkjunum. Náið samstarf við stærsta flugvélaleigusala heims er ætlað að tryggja hagstæð kjör á þremur systurvélum.

Í fréttatilkynningu frá Play kemur fram að flugrekstrarlefyið sé í höfn. Undanfarnar vikur hafi flugvirki á vegum Play verið í Houston í Texas að undirbúa nýja flugvél til afhendingar. Fleiri fulltrúar Play bættust í hópinn í vikunni til að taka vélina út fyrir íslenska skráningu sem lauk seint í gærkvöldi.

Við flugvélinni tóku Andri Geir Eyjólfsson forstöðumaður tæknideildar, Halldór Guðfinnsson og Friðrik Ottesen flugstjórar en undirbúningur að fyrsta flugi Play, á nýju flugrekstrarleyfi félagsins, er í fullum gangi að sögn Birgis Jónssonar forstjóra.

Flugvélin, TF-AEW sem er af gerðinni A321NEO, frá Airbus og árgerð 2018, fer nú í skýli þar sem hún verður máluð í einkennislitum PLAY. Að því loknu kemur vélin heim til Íslands og er þá tilbúin að hefja sig til flugs með farþega Play á fyrstu áfangastaði félagsins.

Birgir Jónsson, forstjóri Play.

TF-AEW er fyrst þriggja systurvéla sem Play hefur tryggt sér frá AerCap, stærsta flugvélaleigusala í heimi. Vélar tvö og þrjú eru í innleiðingu og skráningu eins og stendur og koma einnig til landsins á næstu vikum samhliða stækkun leiðakerfis Play.

Birgir segir að það sé stjórnendum og stjórn Play mjög ofarlega í huga á þessum tímamótum að þakka frábæru starfsfólki sem hefur undanfarin tvö ár staðið þétt saman í þessu stóra verkefni.

„Hér er ótrúlegur andi. Við erum með frábært starfsfólk sem hefur unnið þrekvirki við fordæmalausar aðstæður þar sem unnið er af fagmennsku, gleði og virðingu. Fyrir tilvonandi viðskiptavini PLAY vil ég segja þetta, það er mikil tilhlökkun hjá okkur öllum að taka á móti ykkur um borð í nýlegar og hagkvæmar flugvélar okkar. Við ætlum að bjóða samkeppnishæf verð og einfalt ferðalag en þannig verðum við nauðsynleg viðbót við íslenskan flugmarkað,“ segir Birgir í tilkynningu.


Tengdar fréttir

Þóra fer frá Icelandair yfir til Play

Þóra Eggertsdóttir hefur verið ráðin framkvæmdastjóri fjármálasviðs Play. Mun hún bera ábyrgð á að byggja upp fjármálasvið flugfélagsins sem og að leiða skráningu Play á Nasdaq First North Iceland markaðinn. 

Búast ekki við að anna eftirspurn út 2022

Forsvarsmenn Sony vöruðu nýverið hóp greinenda við því að fyrirtækið myndi ekki anna eftirspurn eftir PlayStation 5 út árið 2022. Vandræðin má bæði rekja til mikillar eftirspurnar og skorts, meðal annars á hálfleiðurum.

Flugfélögin sem boða komu sína í sumar

Von er á allt að tuttugu flugfélögum með áætlunarflug um Keflavíkurflugvöll í sumar. Formaður Samtaka ferðaþjónustunnar segir að fyrsta júlí ætti að vera orðið nokkuð auðvelt að taka á móti ferðamönnum á Íslandi.

Fyrsta flug Play áætlað 24. júní?

Stjórnendur Play hafa ákveðið að fyrsta flug félagsins fari í loftið 24. júní næstkomandi, hefur ViðskiptaMogginn eftir heimildarmönnum. Samkvæmt sömu einstaklingum sé áfangastaðurinn „hernaðarleyndarmál“ en tilkynnt verði um hann á næstunni. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×