Atvinnulíf

Sálin hans Jóns míns vinsælust og stjórnaði sjálf diskótekunum

Rakel Sveinsdóttir skrifar
Auður Lilja Davíðsdóttir.
Auður Lilja Davíðsdóttir. Vísir/Vilhelm

Auður Lilja Davíðsdóttir, framkvæmdastjóri Sölusviðs Öryggismiðstöðvarinnar, myndi treysta sér til þess að keppa á stórmóti í skipulagningu, svo skipulögð er hún. Á morgnana stýrist fatavalið meðal annars af því hvað ljúfa röddin í símaappi eiginmannsins segir en frá unglingsárunum er það Sálin hans Jóns míns sem stendur upp úr.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefni í vinnunni.

Hvenær vaknar þú á morgnana?

„Ég vakna við vekjaraklukku app úr síma eiginmannsins upp úr klukkan sjö á morgnanna, en í því hljómar blíðleg rödd sem býður góðan dag, tilkynnir um hitastig úti og fer stuttlega yfir veðurspá dagsins. Mjög notalegt og getur skorið úr um fataval dagsins. Hvort þörf sé á hlýrri peysu eða hvort það viðri fyrir fallegan kjól.

Annars finnst mér gott að sofa og met svefn mikils, hann nærir bæði líkama og sál. Einhvern tímann las ég líka að hann hægði á öldrun og það er óneitanlega góður kaupauki.“

Hvað er það fyrsta sem þú gerir á morgnana?

„Vek köttinn sem sefur upp í hjá okkur hjónum og helst ofan á öðru hvoru okkar. Ég vakna ekki almennilega fyrr en eftir sturtu svo hún á sitt mikilvæga pláss í upphafi dagsins, svo er það sá yngsti sem þarf að undirbúa fyrir skóladaginn, nestið og skutl í skólann.

Þá taka við fyrstu símtöl dagsins en nýti gjarnan aksturstíma til og frá vinnu í símtöl og þegar að á skrifstofuna er komið þá er það tölvupósturinn.

Þegar að ég er í fjarvinnu þá finnst mér gott að setjast við eldhúseyjuna og lesa póstana yfir góðum kaffibolla, færi mig svo yfir á heimaskrifstofuna sem hefur reynst gríðarlega mikilvæg á þessum COVID tímum.“

Hvaða hljómsveit, lag eða söngvari kemur fyrst upp í hugann þegar þú hugsar til unglingsáranna?

„Sálin hans Jóns míns átti hug minn allan frá því snemma á unglingsárunum en svo bjó ég vel af því að eiga tónelskan eldri bróður, hann Davíð sem var duglegur að kynna mig fyrir tónlist úr ólíkum áttum, eftirminnilegast af því og þau sem eru ennþá í miklu uppáhaldi eru til dæmis Dire Strats, U2, R.E.M., Pixies, David Bowie og meistari Megas.

Ég hlustaði mikið á tónlist sem unglingur og státaði af góðu safni sem kom að góðum notum þegar að haldin voru diskótek í Grunnskólanum á Þingeyri og mér fannst alls ekki leiðinlegt að fá að stjórna tónlistinni. 

Það á reyndar ennþá við í dag, þó diskótekunum hafi fækkað.“

Kisi tók ekki annað í mál en að fá að vera með á nokkrum myndum. Auður byrjar daginn á því að vekja köttinn, sem helst vill sofa ofan á henni eða eiginmanninum.Vísir/Vilhelm

Í hvaða verkefni ertu að vinna helst í þessa dagana?

„Það eru gífurlega mörg járn í eldinum sem við í Öryggismiðstöðinni erum að vinna að þessa stundina og við höfum nýtt síðast liðna mánuði afar vel í fjölbreyttum verkefnum sem öll eru til þess að ætluð að efla okkur ennþá frekar. 

Við höfum verið að vinna mikið að innviðauppbyggingu fyrirtækisins ásamt því að þróa og þroskar nýjar leiðir til vaxtar. Við erum sífellt stækkandi fyrirtæki og það byggist ekki síst á því frábæra fólki sem í fyrirtækinu starfar.

Einnig er ég að vinna að lokaritgerð í MBA námi sem ég lýk í vor frá Háskóla Íslands og með því verkefni lýkur tveggja ára námi, með blendnum tilfinningum því þetta hefur verið alveg einstaklega frábær tími, með einstöku fólki og verið afar lærdómsríkur.“

Hvernig skipuleggur þú þig í vinnu?

„Á margvíslegan hátt, ég gæti mögulega átt Íslandsmet í skipulagningu og ef það væri keppnisgrein væri ég að minnsta kosti mjög efnilegur keppandi. 

Ég stillti tölvupóstforritið mitt þannig að það opnast á dagatalinu. Þá sé ég strax í upphafi viku og hvers dags hvað er framundan. 

Tek frá tíma fyrir mikilvæg verkefni og bóka hann í dagatalið með áminningum. 

Með því móti reyni ég að vinna gegn því að tölvupósturinn og síminn stýri verkefnunum og ég sinni ekki bara því sem er áríðandi, heldur því sem er mikilvægt. 

Ég vil hafa fundi stutta, bóka gjarnan örfundi, tíu til fimmtán mínútur og fæ mótþróaþrjóskukast reyni einhver að bóka mig á klukkustundar langa fundi. Það er nefnilega staðreynd að flest fundarefni má afgreiða og koma í farveg á töluvert styttri tíma. 

Ég geri verkefnalista og fannst eins og almættið hefði bænheyrt mig þegar að Microsoft Planner leit dagsins ljós, nýlega prófaði ég líka Trello fyrir tilstuðlan bekkjarsystur en öll svona skipulagningartæki finnst mér undursamleg.“

Hvenær ferðu að sofa á kvöldin?

„Ekkert of seint, mér finnst gott að vakna úthvíld. Ég sofna út frá bókalestri, fer ekkert næturlangt án þess að hafa Kyndilinn minn, rafbókina meðferðis. Hann á vísan stað undir koddanum mínum hvort sem það er heima eða að heiman. Lestur er besta svefnmeðal og með tilkomu rafbókarinnar þarf ekki einu sinni að slökkva ljós að lestri loknum, hún sofnar sjálf stuttu á eftir mér.“


Tengdar fréttir

Íþróttanördinn í Landsbjörg viðurkennir stríðni barna sinna

Nýr framkvæmdastjóri Slysavarnafélagsins Landsbjörg, Kristján Harðarson, viðurkennir að hann sé algjör alæta á íþróttir. Svo mikill íþróttanörd er hann reyndar, að börnin gera að honum smá grín. Kristján skipuleggur verkefnin sín í lok hverrar vinnuviku en þessa dagana er annasamt í vinnunni; Ekki síst vegna eldgossins í Fagradalsfjalli.

Getur ekki lengur vaknað í rólegheitum á morgnana

Hera Grímsdóttir, forseti Iðn- og tæknifræðideildar við Háskólann í Reykjavík (HR), segir nýjasta fjölskyldumeðliminn, tíu vikna Bichon tík, vera að hrófla við allri hefðbundinni morgunrútínu. Heru finnst best að skipuleggja verkefni vikunnar á mánudögum og þar sem iðn- og tæknifræðideild HR hefur stækkað svo mikið frá því að hún var stofnuð fyrir tveimur árum, eru verkefni vikunnar æði mörg.

Öðruvísi prógram í grísavikum og vonlaus í hárgreiðslu dótturinnar

Reynir Örn Þrastarson, matreiðslumaður, sölufulltrúi hjá Heildsölu Ásbjörns Ólafssonar og lottókynnir, segir oft í gríni að vinnan hans felist í að trufla aðra kokka í sinni vinnu. Því starfið kallar á heimsóknir til viðskiptavina víðs vegar um landið. Í grísavikum er prógramið nokkuð frábrugðið því þá býr dóttir hans hjá honum. Sem segir hann algerlega vonlausan hárgreiðslumann.

Þökk sé Co­vid: Að verja doktors­rit­gerðina sína í Polly­önnu

Svanhildur Konráðsdóttir forstjóri Hörpu, segir starfsfólkið í Hörpu á heimsmælikvarða þegar það kemur að viðburðarhaldi, enda flókið að standa fyrir menningarviðburðum í því síbreytilega ástandi sem nú stendur yfir. Hún viðurkennir að hún sé algjör morgunhani og kvöldsvæf, en gift nátthrafni. Þau hjónin hafi þó orðið nokkuð flink í því að stilla sig saman inn á sameiginlegan miðbaug.

Byrjar daginn á að knúsa eiginkonuna

Andri Þór Guðmundsson, forstjóri Ölgerðarinnar, segir heimilishundinn Heru ekki hafa húmor fyrir því að bíða of lengi eftir morgunmatnum. Hann byrjar daginn á því að knúsa konuna sína en þessa dagana er í mörgu að snúast því framundan er stækkun Ölgerðarinnar.  





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.