Viðskipti innlent

Hlíðar­búar vilja smur­brauð í stað smur­olíu

Eiður Þór Árnason skrifar
Smurstöðin er vel staðsett nærri íbúðabyggð og Bústaðavegi.
Smurstöðin er vel staðsett nærri íbúðabyggð og Bústaðavegi. Jóhanna Svala Rafnsdóttir

Íbúar í Hlíðum vilja sjá veitingarekstur í gömlu smurstöðinni við Skógarhlíð og fá kaffi og kruðerí þar sem nú fæst bensín og smurolía. Á ýmist að skipta út einum svörtum vökva fyrir annan eða opna fjölorkustöð sem þjónar fýrum jafnt sem bílum.

Umræða um stöðina kviknaði í Facebook-hópi hverfisins þar sem um 180 taka undir ákallið og láta sig dreyma um smurbrauð, bjór og bakkelsi í stílhreina húsinu sem hannað var af Þóri Sandholt arkitekt.

Bragi Þorsteinsson, annar eigandi smurstöðvarinnar sem rekin er í húsnæðinu tekur nokkuð vel í hugmynd íbúanna og segist opinn fyrir því að reyna að finna lausn sem henti öllum aðilum.

Hjón vildu opna kaffihús

Bragi hefur rekið stöðina ásamt mági sínum Bent Helgasyni frá árinu 2016 en smurstöð hefur verið rekin í húsinu allt frá árinu 1955. Bragi kannast við áhugann segir að hjón nokkur hafi leitað til máganna og leigusalans Skeljungs með hugmynd um að hefja þar kaffihúsarekstur fyrir um tveimur árum. Þær viðræður hafi þó runnið út í sandinn.

„Ég held að það hafi bara verið frekar erfitt í framkvæmd að koma þessu fyrir svo við myndum hafa afgreiðslu og annað. Við erum líka með búð þarna með olíuvörum og þyrftum eiginlega að fórna henni til að koma fyrir annarri starfsemi.“

Verslun má einnig finna í húsnæðinu.Jóhanna Svala Rafnsdóttir

Sakar aldrei að setjast niður

Bragi segist skilja vel að íbúum hverfisins þyki staðsetningin og sjarmerandi húsið vera eftirsóknarverður staður fyrir bar eða kaffihús. Slíkar hugmyndir þyrfti þó að útfæra í samvinnu við máganna og Skeljung.

„Það þarf bara að hefja einhverja umræðu til að sjá hvort þetta sé gerlegt, það leit ekkert rosalega vel út síðast. Húsið er þannig uppsett að það þyrfti frekar mikið rask til að koma þessu fyrir en það sakar aldrei að setjast niður,“ bætir Bragi við.

Hann á heldur erfitt með að sjá veitingadrauma íbúanna raungerast á meðan smurolían flæðir enn í húsnæðinu.

„En ef þetta væri eitthvað sem virkaði fyrir alla aðila þá er ekki hægt að útiloka neitt.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×