Fótbolti

AC Milan hættir líka: Verðum að hlusta á raddir stuðningsmanna

Sindri Sverrisson skrifar
Zlatan Ibrahimovic og félagar eru á leið í Meistaradeild Evrópu á næstu leiktíð, en ekki Ofurdeildina.
Zlatan Ibrahimovic og félagar eru á leið í Meistaradeild Evrópu á næstu leiktíð, en ekki Ofurdeildina. Getty/Nicolò Campo

Ítalska félagið AC Milan hefur formlega dregið sig út úr Ofurdeildinni og aðeins spænsku félögin Real Madrid og Barcelona eiga eftir að senda frá sér yfirlýsingar varðandi framtíð keppninnar.

Juventus sendi nú í hádeginu frá sér yfirlýsingu þar sem félagið viðurkenndi að ekkert yrði af þeirri ofurdeild sem fyrirhuguð var. Félagið hefði þó enn trú á því að verkefnið hefði orðið til góðs.

Í yfirlýsingu frá AC Milan segir að félagið verði að taka til greina þau skýru skilaboð sem stuðningsmenn um allan heim hafi sent frá sér í kjölfar þess að tilkynnt var um fyrirhugaða ofurdeild á sunnudagskvöld.

Í yfirlýsingu AC Milan segir:

„Við tókum boðinu um að vera með í Ofurdeildarverkefninu með það skýra markmið að búa til bestu mögulegu Evrópukeppni fyrir fótboltaaðdáendur um allan heim, með hag félagsins og stuðningsmanna okkar að leiðarljósi.

Breytingar eru ekki alltaf auðveldar en þróun er nauðsynlegt til að komast áfram, og uppbygging evrópsks fótbolta hefur þróast og breyst í gegnum áratugina.

Hins vegar hafa raddir og áhyggjur stuðningsmanna um allan heims heyrst skýrt og greinilega, varðandi Ofurdeildina, og AC Milan verður að taka tillit til radda þeirra sem elska þessa dásamlegu íþrótt.

Við höldum áfram að vinna að sjálfbæru módeli fyrir fótboltann.“

Tólf félög lýstu í upphafi því yfir að þau ætluðu að koma á fót Ofurdeildinni. Manchester City, Manchester United, Arsenal, Liverpool, Tottenham, Chelsea, Inter, AC Milan og Atlético Madrid hafa lýst því yfir að þau hafi dregið sig út úr hópnum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.