Rolls-Royce átti besta ársfjórðung sögunnar

Kristinn Ásgeir Gylfason skrifar 14. apríl 2021 06:00

Rolls-Royce hefur aldrei selt fleiri bíla á einum ársfjórðungi eins og þeim fyrsta á þessu ári. Rolls-Royce afhenti 1380 bíla á fyrsta ársfjórðungi. Fyrirtækið hefur aldrei afhent fleiri bíla í einum ársfjórðungi í 116 ára sögu framleiðandans.

Þá hefur Rolls-Royce gefið út að pantanir nái langt inn á seinni helming ársins. Það má því reikna með að Rolls-Royce haldi skriði. Rolls-Royce hefur sagt að tölurnar tali sínu máli um hversu gott Rolls-Royce er í að vera Rolls-Royce. Þá er átt við að bílarnir hafi haldið einkennum sínum þrátt fyrir að vera í eigu BMW.

„Við höfum brugðist vel við nýlegum áskorunum með sömu áræðni, ímyndunarafli og hugvitssemi þetta gerum við með mikilli skipulagningu og stöðugri áherslu á viðskiptavini okkar og þeirra kröfur,“ sagði Torsten Müller-Ötvös, framkvæmdastjóri Rolls-Royce vegna ársfjórðungsuppgjörsins.

Hér að neðan má sjá myndband frá Carwow á Youtube um Rolls-Royce Ghost.

Salan hjá Rolls-Royce jókst um 62% á milli fyrsta ársfjórðungs í fyrra og ársins í ár. Sem sýnir að miklu leyti hversu mikið Rolls-Royce treystir á sölur í Kína, þar sem nánast ekkert seldist á fyrsta ársfjórðungi síðasta árs í Kína.

„Við erum orðin ökumanns merki í dag. Við vorum áður bílstjóra merki, en það hefur umpólast. Fæstir kaupendur í dag eru nú orðið með bílstjóra til að aka bílnum, undanskilinn er Phantom bíllinn í löngu útgáfunni. Allt annað frá okkur eru ökumannsbílar,“ sagði Müller-Ötvös um Rolls-Royce fyrir tveimur árum.