Arnar segir það vel koma til greina að tala við Viðar og hreinsa loftið

Margir hafa gagnrýnt landsliðsþjálfarana að hafa ekki valið Viðar í landsliðið ekki síst eftir að Björn Bergmann Sigurðarson datt út úr hópnum. Þessi gagnrýni hefur ekki minnkað eftir tvo markalausa leiki í röð.

Arnar kom seinna með þá skýringu að Vålerenga hafi ekki leyft Viðari að koma í þessa landsleiki en Viðar sjálfur hefur sagt að það sér ekkert til í því.

Arnar var spurður út í fjölmiðlafárið í kringum Viðar og það að áhugi framherjans á að spila fyrir íslenska landsliðið hafi minnkað.

„Í fyrsta lagi finnst mér mjög leiðinlegt að það sé svona umræða í gangi. Það var aldrei ætlunin hjá mér að búa til eitthvað leiðindamál. Mér þykir mjög miður ef að áhugi Viðars á landsliðinu hefur minnkað. Ég hef alltaf sagt að hann sé einn af þeim leikmönnum sem koma til greina,“ sagði Arnar Þór á blaðamannafundinum.

Arnar vill gera upp þetta mál en ekki í fjölmiðlum eins og síðustu daga heldur með því að ræða við leikmanninn sjálfan.

„Þegar það koma svona mál upp finnst mér best að tala um hlutina og vera mjög hreinskilinn og heiðarlegur. Það kemur vel til greina að hafa samband við Viðar þegar leiknum á morgun er lokið, til að tala saman og hreinsa loftið. Ég held að það væri hollt fyrir alla,“ sagði Arnar Þór á fundinum.