Guðlaugur Þór Þórðarson, utanríkis- og þróunarsamvinnuráðherra, tekur á morgun þátt í alþjóðlegri jafnréttisráðstefnu sem hefst í Mexíkóborg í dag. Ráðstefnan ber yfirskriftina „Kynslóð jafnréttis“ og stendur yfir fram á miðvikudag. Hún er hluti af samnefndu átaksverkefni sem UN Women ýtti úr vör á síðasta ári þegar aldarfjórðungur var liðinn frá Pekingáætluninni. Ráðstefnan er haldin í fjarfundaformi, á Zoom.
Ísland er meðal forysturíkja í aðgerðarbandalagi um verkefnið sem er það stærsta í sögu UN Women frá upphafi. Ísland leiðir aðgerðabandalag um aðgerðir gegn kynbundnu ofbeldi ásamt Bretlandi, Kenía og Úrúgvæ. Fjögur markmið aðgerðabandalagsins verða kynnt á fundinum sem er öllum opinn og hægt að skrá sig hér.
Markmið ráðstefnunnar er að vinna að úrbótum á sviðum þar sem enn hallar á konur og stúlkur fimm árum eftir að ríki heims komu sér saman um heimsmarkmiðin sautján. Að sögn UN Women hefur komið í ljós að fimmta heimsmarkmiðið um jafnrétti kynjanna er það markmið sem skemmst er á veg komið. Heimsfaraldur COVID-19 hafi enn frekar hægt á vinnu aðildarríkja Sameinuðu þjóðanna að markmiðinu sem merkja megi meðal annars af gífurlegri fjölgun tilkynninga um kynbundið ofbeldi gegn konum.
Á ráðstefnunni fara fram umræður um skipulegar og kerfislegar hindranir sem hindra að raunverulegt jafnrétti kynja náist og að mannréttindi kvenna og stúlkna séu virt. Markmið ráðstefnunnar er að styrkja rödd feminískra ungmenna- og kvennasamtaka og kvennahreyfinga um allan heim og eiga samtal við mismunandi hagaðila frá aðildaríkjum, einkageiranum og alþjóðastofnunum.
Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.
