Íslensku strákarnir hafa ekki tapað fyrsta leik í undankeppni í áratug

Íslenska karlalandsliðið í knattspyrnu hefur byrjað allar undankeppnir vel síðan að Lars Lagerbäck kom til starfa árið 2011. Nú reynir á það á móti stórliði Þýskalands í kvöld þar sem liðið spilar sinn fyrsta leik í undankeppni HM 2022.

Íslensku strákarnir hafa unnið þrjá af síðustu fjórum opnunarleikjum sínum í undankeppni HM eða EM og í þeim fjórða gerði liðið jafntefli á útivelli. Liðið er því taplaust í fyrsta leik í undankeppni í áratug.

Lars Lagerbäck var þjálfari íslenska landsliðsins frá 2011 til 2016 og fór með liðinu í bæði undankeppni HM 2014 og undankeppni EM 2016. Í báðum keppnum byrjaði íslenska landsliðið á sigri, fyrst 2-0 sigri á Noregi í undankeppni HM 2014 og svo 3-0 sigri á Tyrklandi í undankeppni EM 2016. Í seinni leiknum var Heimir Hallgrímsson orðinn aðalþjálfari með Lars.

Íslenska liðið vann líka fyrsta leik sinn í síðustu undankeppni þegar liðið var undir stjórn Erik Hamrén. Íslensku strákarnir unnu þar 2-0 útisigur á Andorra með mörkum þeirra Birkis Bjarnasonar og Viðars Arnar Kjartanssonar.

Íslenska landsliðið hefur reyndar komist yfir í fyrsta leik í öllum undankeppnum frá 2010 því íslenska liðið komst í 1-0 í 1-2 tapi á móti Noregi í undankeppni EM 2012. Íslenska liðið skoraði líka á undan í 1-1 jafntefli úti í Úkraínu í fyrsta leik sínum í undankeppni HM 2018.