Atvinnulíf

Þessar fjórar ástæður geta gert fólk örmagna á fjarfundum

Rakel Sveinsdóttir skrifar
Ingrid Kuhlman.
Ingrid Kuhlman. Vísir/Silla Páls

Hertar sóttvarnarreglur leiða enn fleira starfsfólk heim í fjarvinnu, svo ekki sé talað um námsfólk á öllum aldri. Það er því ekki úr vegi að rifja aðeins upp þau einkenni rafrænnar þreytu sem allir þurfa að vera vakandi yfir og Ingrid Kuhlman, framkvæmdastjóri Þekkingarmiðlunar, fór yfir með okkur á dögunum. 

Um þessi einkenni má lesa hér.

Í dag segir Ingrid okkur hins vegar frá helstu niðurstöðum nýrrar rannsóknar sem sýna að langvarandi myndspjall getur leitt til rafrænnar þreytu.

„Ef hugsunin um enn einn fjarfund á Teams eða Zoom tæmir orkubrunninn kemur það ekki á óvart. Vísindamenn á Stanford Virtual Human Interaction Lab komust að því í rannsóknum sínum að langvarandi myndspjall getur leitt til rafrænnar þreytu,“ segir Ingrid en hún er jafnframt með meistaragráðu í jákvæðri sálfræði.

Í tímaritinu Technology, Mind and Behavior birtu vísindamennirnir helstu niðurstöður og gáfu góð ráð. Þar má sjá að það eru helst fjórar ástæður sem skýra það út hvers vegna fjarfundir geta gert fólk örmagna. Samhliða gáfu þeir góð ráð til að takast

1. Of mikið og náið augnsamband

Á fjarfundum eru augu þín límd við skjáinn á meðan mörg andlit í nærmynd stara stöðugt á þig, sama hver hafi orðið. Þetta getur ekki aðeins vakið tilfinningar um félagsfælni heldur býður einnig upp á fá tækifæri til að hvíla augun. 

Gott ráð:

Hægt er að leysa þetta með því að stilla ekki á fullan skjá (e. full screen) eða styðjast við ytra lyklaborð til að skapa smá fjarlægð milli þín og skjásins.

2. Að sjá sjálfan sig í speglinum

Flest samskiptaforrit hafa lítinn glugga þar sem maður getur séð sjálfan sig meðan á fundinum stendur. Þessi óeðlilega tilfinning að stara á sjálfan sig marga klukkutíma á dag getur leitt til aukinnar sjálfsgagnrýni. 

Gott ráð:

Möguleg lausn á þessu er að fela sjálfsmyndina (e.hide self-view).

3. Minni hreyfanleiki

Fjarfundir binda okkur við einn stað og koma í veg fyrir að við getum hreyft okkur frjálslega. 

Gott ráð:

Hægt er að leysa það með því að staðsetja myndavélina á þann hátt að skapa smá fjarlægð og sveigjanleika til að bæta hreyfanleika. Prófaðu sem dæmi að standa frekar en að sitja við skrifborð.

4. Skortur á félagslegum vísbendingum

Við treystum mikið á óyrtri tjáningu, svo sem tjáskipti án orða, í persónulegum samskiptum við annað fólk, jafnvel meira en á tjáskipti með orðum. 

Þegar skortur er á óytri tjáningu, eins og er tilfellið á fjarfundum, þarf heilinn að vinna enn betur til að vinna úr og skilja það sem viðmælandi er að reyna að koma á framfæri. Þetta getur skapað andlega þreytu. 

Gott ráð:

Að leyfa fólki að velja hvort það hafi kveikt á myndavélinni eða hljóðinu, til dæmis meðan á fyrirlestri stendur, getur veitt því nauðsynlega hvíld. Einnig getur verið gott að snúa líkamanum frá skjánum þegar slökkt er á myndavélinni.


Tengdar fréttir

Sjö góð ráð fyrir hundaeigendur í fjarvinnu

Hundar eru næmir á líðan eigenda sinna og félagsverur miklar. Það getur hins vegar skapað ný vandamál þegar hundaeigendur eru mikið heima, til dæmis í fjarvinnu eða eru frá vinnu vegna kórónuveirunnar eins og nú er algengt.

Fatnaður í fjarvinnu: Kósý eða „casual“?

Í fjarvinnunni hafa margir farið þá leið að vera betur til hafðir að „ofan“ en „neðan“ eða hreinlega vinna í joggingbuxum eða náttfötum alla daga. En hverju er mælt með?





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.