Kári, Hannes, Birkir Már, Ari Freyr og Kolbeinn allir með í fyrsta hóp Arnars

Arnar Þór Viðarsson, þjálfari A-landsliðs karla í fótbolta, tilkynnti í dag sinn fyrsta landsliðshóp en framundan eru þrír fyrstu leikir íslensku strákanna í undankeppni HM 2022.

Arnar Þór valdi alla gömlu leikmennina í hópinn sinn og þá kemur Björn Bergmann Sigurðarson aftur inn í landsliðið.

Arnar Þór tók við íslenska landsliðinu rétt fyrir jól en nú næstum því þremur mánuðum síðar er komið af fyrsta verkefni liðsins undir hans stjórn. Þetta eru fyrstu leikir liðsins síðan að liðið tapaði á móti Englandi á Wembley 18. nóvember.

Arnar Þór og aðstoðarmenn hans Eiður Smári Guðjohnsen og Lars Lagerbäck völdu 25 leikmenn í hópinn fyrir þessa þrjá leiki sem eru allir á útivelli og á móti Þýskalandi, Armeníu og Liechtenstein.

Gamla bandið er allt saman til staðar í þessu fyrsta verkefni. Kári Árnason, Hannes Þór Halldórsson, Birkir Már Sævarsson og Ari Freyr Skúlason litu út fyrir að vera að kveðja landsliðið eftir Englandsleikinn í nóvember en þeir eru allir með í þessum hóp.

Kolbeinn Sigþórsson heldur líka sæti sínu í liðinu og þá kemur Björn Bergmann Sigurðarson aftur inn í landsliðið eftir nokkra fjarveru.

Arnór Sigurðsson og Alfons Sampsted eru í þessum hóp og það er því öruggt að þeir verða ekki með 21 árs landsliðinu í úrslitakeppni EM.

Þrír leikmenn úr Pepsi Max deildinni eru í hópnum eða þeir Hannes Þór Halldórsson og Birkir Már Sævarsson hjá Val og Kári Árnason hjá Víkingi.

Alfreð Finnbogason getur ekki tekið þátt í þessu verkefni vegna meiðsla og þá var Viðar Örn Kjartansson ekki valinn. Framherjarnir Hólmbert Aron Friðjónsson og Björn Bergmann Sigurðarson koma aftur á móti aftur inn í staðinn.

Arnar Þór fór yfir valið á þessum fyrsta hóp sínum á fjarfundi með íslenskum blaðamönnum í dag.

Ísland mætir Þýskalandi 25. mars, Armeníu 29. mars og Liechtenstein 31. mars, en allir leikirnir eru liður í undankeppni HM 2022.

Þetta eru fyrstu leikirnir undir stjórn Arnars Þórs og á sama tíma verður leikurinn gegn Þýskalandi leikur númer 500 hjá A karla.