Innlent

Fresta samræmdu prófunum og breyta fyrirkomulagi

Kolbeinn Tumi Daðason skrifar
Nemendur í 9. bekk í Réttarholtsskóla voru á meðal þeirra sem þreyttu íslenskupróf í morgun.
Nemendur í 9. bekk í Réttarholtsskóla voru á meðal þeirra sem þreyttu íslenskupróf í morgun. vísir/vilhelm

Ákveðið hefur verið að fresta samræmdum prófum hjá nemendum í 9. bekk grunnskóla sem fara áttu fram fyrri hluta þessarar viku. Próftaka hefst mánudaginn 15. mars og þá hafa grunnskólarnir tveggja vikna glugga til að stilla upp prófunum hjá sér í íslensku, stærðfræði og ensku.

Uppi varð fótur og fit í mörgum grunnskólanum í morgun þegar nemendur í 9. bekk gátu sumir hverjir ekki komist inn í samræmda prófið í íslensku. Vandamál gerðu vart við sig í sjötíu skólum af 150. Forstjóri Menntamálastofnunar segir prófakerfið algjörlega ófullnægjandi en standi á ríkinu að fjárfesta í betra kerfi.

Frestunin um tvær vikur gefur hverjum skóla fyrir sig færi á að velja prófdaga fyrir sína nemendur innan tveggja vikna glugga. Allir nemendur í hverjum skóla fyrir sig þurfa þó að taka prófið sama dag.

Arnór Guðmundsson, forstjóri Menntamálastofnunar, skellti upp úr þegar blaðamaður spurði hvort ráðuneytið hefði veitt einhver viðbrögð varðandi að kaupa dýrara prófkerfi fyrir samræmdu prófin. Hann sagði ekkert nýtt að frétta í þeim efnum.Vísir/Vilhelm

Arnór Guðmundsson, forstjóri Menntamálastofnunar, segir frestunina og nýja fyrirkomulagið gera tvennt. Annars vegar gefa Menntamálastofnun færi á að fara rækilega yfir prófakerfið með þjónustuaðilanum og hins vegar dreifa álaginu á prófakerfið yfir tíu daga í stað þriggja.

Stór hluti nemenda náði að ljúka íslenskuprófinu í morgun. Arnór segir þessa nemendur hafa val um hvort þeir endurtaki prófið eða láti niðurstöðuna úr prófinu í dag standa.

Arnór segir ákvörðunina tekna í samráði við menntamálaráðuneytið. Arnór sagði í hádegisfréttum Bylgjunnar að núverandi prófakerfi væri algjörlega ófullnægjandi. Engin merki væru þó hjá ráðuneytinu að fjárfesta í nýju og dýru prófakerfi enda væri nokkur óvissa um framtíð samræmdra prófa.  

Upphaflega stóð til að nemendur þreyttu íslenskuprófið í dag, stærðfræði á morgun og ensku á miðvikudaginn.

Að neðan má sjá tilkynningu frá Menntamálastofnun sem send var klukkan 17:05.

Samræmd könnunarpróf færð yfir á varaprófdaga sem verður fjölgað í 10 daga

Próf í stærðfræði og ensku færð yfir á varaprófdaga Nemendur geta þreytt próf í íslensku aftur

Skólar hafa tvær vikur til að leggja fyrir öll þrjú prófin fyrir

Við fyrirlögn samræmds könnunarprófs í íslensku í 9. bekk í morgun komu upp tæknileg vandamál í prófakerfi. Vandinn lýsti sér í því að hluti nemenda átti erfitt með að komast inn í prófin eða duttu út úr kerfinu áður en þeir höfðu lokið próftöku. Samkvæmt fyrstu greiningu hafa um 3.500 nemendur af um 4.200 lokið prófinu en ljóst er að hluti nemenda tók prófið við ófullnægjandi aðstæður.

Menntamálastofnun ber ábyrgð á framkvæmd samræmdra könnunarprófa í grunnskólum og harmar þau vandamál sem komu upp við fyrirlögn þeirra. Eru nemendur og starfsfólk skóla beðið afsökunar á þeim óþægindum sem þetta hefur valdið. Stofnunin er nú að greina stöðuna með þjónustuaðila prófakerfisins og vinna að viðeigandi úrlausn. Þar sem ekki hefur fengist fullnægjandi lausn á þeim vanda sem upp kom í morgun var nauðsynlegt að endurskoða fyrirlögn prófanna.

Að höfðu samráði við mennta- og menningarmálaráðuneyti hefur verið ákveðið að fresta samræmdum könnunarprófum í stærðfræði og ensku í þessari viku. Skólum er gefinn kostur á að leggja öll þrjú samræmdu könnunarprófin fyrir á tveggja vikna tímabili frá og með næsta mánudegi. Þannig hafa skólar val um hvaða próf þeir leggja fyrir og hvenær á tímabilinu 15.-26. mars. Allir nemendur innan hvers skóla verða að taka sama próf á sama degi. Við þessar krefjandi aðstæður hefur ekki verið svigrúm til að eiga samráð og samtal við foreldra og nemendur en stefnt er að því næstu daga.

Með þessu fyrirkomulagi telur Menntamálastofnun að unnt verði að leggja samræmd könnunarpróf fyrir með viðunandi hætti og skapa skólum svigrúm til að ljúka fyrirlögn þeirra án þess að mikil röskun verði á skólastarfi.


Tengdar fréttir

„Algjörlega ófullnægjandi prófakerfi“ en ekki á dagskrá að kaupa nýtt

Arnór Guðmundsson, forstjóri Menntamálastofnunar, segir stofnunin endurtekið hafa bent menntamálaráðuneytinu á þörfina fyrir betra prófakerfi. Það hafi verið gert þegar kerfið hrundi árið 2018. Óvissa um framtíð samræmdra prófa geri að verkum að tregða sé til að fjárfesta í nýjum og dýrum kerfum.

Enn á ný vandræði með samræmdu prófin

Nemendur í 9. bekk víða um land eiga í erfiðleikum með að þreyta samræmd könnunarpróf í íslensku. Forstjóri Menntamálastofnunar sem sér um framkvæmd prófsins segir málið í skoðun. Það tengist þjónustuaðila erlendis. Svo virðist sem vandamálið sé í sumum skólum en öðrum ekki.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.