Heimsmarkmiðin

Varnargarðar reistir við fiskmarkaðinn í Panyimur

Heimsljós

Nýbygging við fiskmarkað á bökkum Albertavatns, sem reist var fyrir íslenskt þróunarfé, var um tíma í stórhættu vegna flóða. Framkvæmdum við varnargarða er lokið.

Vatnsyfirborð stöðuvatna í Úganda hefur hækkað umtalsvert á síðustu misserum og víða í grennd við vötnin hafa íbúar orðið fyrir eignatjóni og uppskerubresti vegna flóða. Nýbygging við fiskmarkað á bökkum Albertavatns, sem reist var fyrir íslenskt þróunarfé, var um tíma í stórhættu og heimamenn óskuðu eftir fjárhagslegri aðstoð Íslendinga við byggingu varnargarða. Þeirri framkvæmd lauk og dögunum og nú er starfsemin komin í eðlilegt horf.

Íslendingar hófu samstarf við héraðsyfirvöld í Pakwach héraði fyrir rúmum sjö árum sem fólst í því að reisa yfirbyggingu við fiskmarkað í þorpinu Panyimur, við landmæri Lýðstjórnarlýðveldisins Kongó. Verkefnið var hluti af stóru verkefni Íslendinga um að auka gæði og verðmæti afla úr vötnum í Úganda. Markaðurinn í Panyimur er fjölsóttur af fólki sem kemur víða að, meðal annars frá nágrannaríkjum.

„Sú framkvæmd að byggja yfir markaðinn var mikil lyftistöng fyrir héraðið, ekki síst konurnar sem sjá um viðskiptin,“ segir Finnbogi Rútur Arnarson verkefnastjóri í sendiráði Íslands í Kampala. „Árið 2019 óskaði héraðið enn og aftur eftir samvinnu við sendiráðið, nú um stækkun markaðarins. Starfsemin hafði margfaldast og eldra svæðið réði ekki lengur við þær 3000 fisksölukonur, sem sóttu hann hvern markaðsdag. Þá var ákveðið að tvöfalda markaðinn og því verki lauk í mars á síðasta ári þegar hann var formlega vígður.“

Um svipað leyti fór vatnsyfirborð stöðuvatna í Úganda að hækka eftir gífurlega úrkomu og mikla vatnavexti í ám. Yfirborð Viktoríuvatns hækkaði um 1,4 metra og sömu sögu var að segja um Albertsvatn og Kyogavatn. Að sögn Finnboga Rúts fór eldri hluti fiskmarkaðarins í Panyimur að hluta undir vatn. „Mannvirkin sem við höfum kostað voru í stórhættu og því var ákveðið að reisa varnargarð, til að bjarga því sem bjargað varð. Nú er varnargarðurinn risinn og báðir hlutar markaðarins komnir á þurrt. Starfsemin blómstrar á ný,“ segir Finnbogi Rútur.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.