Viðskipti innlent

2020 algjört metár á fasteignamarkaðnum

Sunna Kristín Hilmarsdóttir skrifar
Veltan á íbúðamarkaði í fyrra sló öll met.
Veltan á íbúðamarkaði í fyrra sló öll met. Vísir/Vilhelm

Þinglýstir kaupsamningar um íbúðarhúsnæði fyrir árið 2020 eru 14% fleiri en árið 2019 eða tæplega 12.100 á móti um 10.600.

Er þetta algjört metár því aðeins árið 2007 var fjöldi kaupsamninga meiri og í nágrenni höfuðborgarsvæðisins og annars staðar á landsbyggðinni var í raun um metár að ræða.

Þá sló veltan á íbúðamarkaði öll met. Veltan, það er heildarupphæðir söluverðs í öllum stökum íbúðaviðskiptum, nam 600 milljörðum króna á síðasta ári sem er nærri 19% meira en árið 2019 á föstu verðlagi og 6% meira en árið 2007.

Þetta kemur fram í nýrri mánaðarskýrslu Húsnæðis- og mannvirkjastofnunar sem kemur út í dag. Þar segir að veltuaukningin undanfarin ár hafi verið sérstaklega mikil á Suðurlandi, Norðausturlandi og á Vestfjörðum en hóflegri á Austurlandi og Norðvesturlandi.

Þetta mikla líf á fasteignamarkaði kemur meðal annars fram í hærra fasteignaverði:

„Mikil eftirspurn eftir íbúðarhúsnæði, auk takmarkaðs fjölda íbúða til sölu og lágra vaxta, hefur óhjákvæmilega leitt til hærra fasteignaverðs. Samkvæmt vísitölu söluverðs HMS hefur íbúðaverð á höfuðborgarsvæðinu hækkað um 8,4% á undanförnum 12 mánuðum í desember og hefur hækkunartakturinn verið að aukast. Í nágrenni höfuðborgarsvæðisins nam hækkunin 6,2% sem er aðeins hærra en hefur verið undanfarna mánuði og annars staðar á landsbyggðinni nam 12 mánaða hækkunin 0,8% sem er ögn meira en mældist í desember en þó hefur hækkunartakturinn þar verið að leita niður á við,“ segir í skýrslunni.

Þá hafa fyrstu kaupendur aldrei verið fleiri en í fyrra; samkvæmt tölum Þjóðskrár voru 30,3% af öllum kaupsamningum á árinu 2020 vegna fyrstu kaupa og hefur hlutfallið ekki mælst hærra eins langt og tölur ná, eða frá þriðja ársfjórðungi 2008.

„Þess má geta að ef tveir aðilar kaupa saman er nóg að annar aðilinn hafi aldrei átt íbúð áður til þess að viðskiptin teljist til fyrstu kaupa,“ segir í skýrslu HMS en hana má nálgast í heild sinni hér.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×