Viðskipti innlent

Fyrsta rafræna þinglýsingin var framkvæmd í gær

Eiður Þór Árnason skrifar
Skrifstofur Sýslumannsins í Kópavogi.
Skrifstofur Sýslumannsins í Kópavogi. Vísir/Vilhelm

Fyrsta rafræna þinglýsingin á Íslandi fór fram í gær og fólst í sjálfvirkri aflýsingu veðskjals í gegnum tölvukerfi banka. Löng bið hefur verið eftir rafrænum þinglýsingum hér á landi en lög þess efnis voru samþykkt á Alþingi í lok árs 2018.

Frá þessu er greint í tilkynningu á vef Stjórnarráðsins en þar segir að frá gildistöku laganna hafi dómsmálaráðuneytið í samstarfi við sýslumannsembættin, Þjóðskrá Íslands, verkefnastofuna um stafrænt Ísland og helstu haghafa unnið að innleiðingu nýrrar framkvæmdar við þinglýsingar.

Andri Heiðar Kristinsson, stafrænn leiðtogi fjármála- og efnahagsráðuneytisins, gaf út í janúar að rafrænar þinglýsingar yrðu að veruleika síðar á þessu ári. Feta Íslendingar þar meðal annars í fótspor Dana og Breta.

  

Við samþykkt lagafrumvarps um rafrænar þinglýsingar árið 2018 sagði Sigríður Á. Andersen, þáverandi dómsmálaráðherra, að með breytingunum yrði ferlið „nánast sjálfkrafa þegar tölvukerfið verður komið í gagnið.“

Þá var haft eftir Bergþóru Sigmundsdóttur, sviðsstjóra hjá Sýslumanninum á höfuðborgarsvæðinu, að með tilkomu rafrænna þinglýsinga yrði fullnægjandi skjölum þinglýst á sekúndubrotum. Fram að þessu hefur móttaka, þinglýsing, afgreiðsla, aflýsing og afhending þinglýstra skjala farið fram á skrifstofu embættis sýslumanns.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.