Segja sig úr Landvernd vegna „öfga“ og „harðlínu“

Atli Ísleifsson skrifar 15. janúar 2021 07:28

Allir fulltrúar Ferðaklúbbsins 4x4 hafa sagt sig úr nefndum Landverndar. Getty/Sharpshooters/VWPics

Ferðaklúbburinn 4×4 hefur sagt sig úr Landvernd sem klúbburinn sakar um að hafa rekið stefnu undanfarin ár sem hafi verið öfgakennd, markast af harðlínu og farið langt út fyrir svið náttúruverndar.

Ferðaklúbburinn 4x4 hefur tilkynnt stjórn Landverndar ákvörðunina að því er fram kemur á heimasíðu klúbbsins.

„Ástæða uppsagnarinnar er stefna Landverndar sem hefur gengið of langt í öllum sínum gjörðum og gengið þvert gegn hagsmunum Ferðaklúbbsins 4×4.

Í þessu sambandi er einnig bent á yfirlýsingu Landverndar vegna Vonarskarðsins en þar er stefna Landverndar sú að loka skuli ökuleið um örfoka sanda fyrir umferð og á sú stefna Landverndar ekkert skylt með náttúruvernd,“ segir í tilkynningunni.

Ferðaklúbburinn 4×4 hafi því ákveðið að segja sig úr og hætta öllum stuðningi við Landvernd. Þá segi allir fulltrúar Ferðaklúbbsins 4×4 sig úr öllum nefndum Landverndar og hefur verið óskað þeir eftir að nafn klúbbsins verði fjarlægt sem félagsaðila innan samtakanna.

Innan Landverndar eru fjörutíu aðildarfélög, en auk þess eru um sex þúsund félagar, að því er fram kemur á heimasíðu samtakanna.

Félagasamtök Umhverfismál Bílar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.