Handbolti

Átján smitaðir í bandaríska handboltalandsliðinu og aðeins tólf fara á HM

Ingvi Þór Sæmundsson skrifar
Robert Hedin er þjálfari bandaríska landsliðsins í handbolta.
Robert Hedin er þjálfari bandaríska landsliðsins í handbolta. getty/Cesar Gomez

Hvorki fleiri né færri en átján leikmenn bandaríska karlalandsliðsins í handbolta eru með kórónuveiruna. Aðeins tólf leikmenn fara á HM í Egyptalandi en fyrsti leikur Bandaríkjanna á mótinu er gegn Austurríki á fimmtudaginn.

„Þetta er ótrúlega erfitt,“ sagði Robert Hedin, sænskur þjálfari bandaríska liðsins, í samtali við Aftenposten. Hedin sjálfur með veiruna.

Einungis tólf leikmenn verða í bandaríska hópnum sem fer til Egyptalands á morgun, þar af einn markvörður.

Bandaríska liðið hefur dvalið við æfingar í Danmörku að undanförnu og undirbúið sig fyrir sitt fyrsta heimsmeistaramót í tuttugu ár. Bandaríkin spiluðu meðal annars æfingaleik við Ribe-Esbjerg sem Rúnar Kárason, Daníel Þór Ingason og Gunnar Steinn Jónsson leika með.

Það gæti orðið skrautlegt í meira lagi enda eru Bandaríkin í mjög sterkum riðli á HM með Frakklandi, Noregi og Austurríki. Efstu þrjú liðin í riðlinum fara með liðunum úr riðli Íslands í milliriðla.

„Við höfum oft farið í skimanir, síðast á mánudaginn,“ sagði Hedin sem var áður þjálfari norska landsliðsins. 

„Þar reyndust allir neikvæðir en þegar við fórum í framhaldsskimun kom í ljós að átján leikmenn voru sýktir. Líklegast hefur einhver borið veiruna með sér frá Bandaríkjunum.“

Fleiri lið á HM eiga í vandræðum vegna kórónuveirunnar, meðal annars Tékkland. Norður-Makedónía er fyrsta varaþjóð inn á HM.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.