Geta ekki stöðvað ólöglegt partý þar sem þúsundir hafa komið saman

Tryggvi Páll Tryggvason skrifar 2. janúar 2021 08:08

Lögreglan í Frakklandi vaktar svæðið. Getty/Fabien Pallueau

Lögreglunni í Frakklandi hefur reynst erfitt að stöðva fjölmennt en ólöglegt partý í grennd við borgina Rennes í Frakklandi, sem staðið hefur yfir frá því á fimmtudag.

BBC greinir frá en um svokallað „rave“ er að ræða. Segir að gestirnir séu hátt í 2.500 í þessu kolólöglega partý-i en strangar útgöngubannsreglur eru í gildi í Frakklandi á milli átta á kvöldin og sex á morgnana.

Partý-ið er haldið í vöruskemmu en í yfirlýsingu frá yfirvöldum á staðnum segir að lögregla hafi reynt að vísa gestum frá, en í stað þess fengið óblíðar móttökur.

Þannig hafi kastast í kekki á milli veislugesta og lögreglumanna. Veislugestir hafi kastað hlutum í lögreglu og kveikt í bíl. Þrír lögreglumenn hafa slasast í aðgerðunum.

Partý-ið hefur staðið yfir frá því á fimmtudag og segir í frétt BBC að sumir gestir ætli sér að vera á staðnum til þriðjudags.

Haft er eftir einum veislugesti að afar fáir hafi virt fjarlægðartakmörk vegna Covid-19. Þá er haft eftir öðrum að svo virðist sem að veislan hafi verið vel skipulögð.

Gerald Darmanin, innanríkisráðherra Frakklands, sat sérsakan neyðarfund vegna veislunnar seint í gærkvöldi, en lögregla vaktar svæðið vel.

2,6 milljónir manna hafa greinst með kórónuveiruna frá því í vor í Frakklandi, alls hafa rétt tæplega 65 þúsund látist af völdum Covid-19 þar í landi.

Frakkland

Tengdar fréttir

Hundrað þúsund lögreglumenn munu koma í veg fyrir samkomur

Yfirvöld í Frakklandi hafa ákveðið að setja hundrað þúsund lögreglumenn í viðbragðsstöðu á gamlárskvöld til þess að sporna gegn samkomum og fögnuðum. Útgöngubann er í gildi frá klukkan 20 og mun lögregla vera með sýnilega viðveru á almenningssvæðum.

30. desember 2020 23:39

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.