43 fá uppsagnarbréf hjá Landsbankanum

Landsbankinn hefur fækkað starfsmönnum í höfuðstöðvum bankans í Austurstræti um 30 auk þess sem ráðningarsamningum allra sem starfa í afgreiðslu bankans í Flugstöð Leifs Eiríkssonar hefur verið sagt upp.

Kristján Kristjánsson, upplýsingafulltrúi bankans, segir í samtali við Vísi að uppsagnirnar í höfuðstöðvunum nái til flestra sviða.

„Þetta er mjög dreift. Í fyrirtækja- og einstaklingsþjónustu, áhættustýringu og bakvinnslu,“ segir Kristján. Aukin áhersla á rafræna afgreiðslu erinda leiði til fækkunar og hagræðingar í bakvinnslu og hjá stoðsviðum. Engar uppsagnir séu í útibúunum sjálfum.

Ástæða uppsagna í Leifsstöð er sú að bankinn er aðeins með samning þar til 30. júní. Til hafi staðið að halda útboð síðastliðið haust vegna bankastarfsemi í flugstöðinni en ekki hafi tekist að klára það. Samningur við bankann hafi verið framlengdur til sumarsins. Um varúðarráðstöfun sé að ræða.

Kristján segir að Landsbankinn muni að sjálfsögðu taka þátt í útboðinu hvenær sem það muni fara fram. Bankinn hafi verið með rekstur í flugstöðinni frá upphafi.

„Við munum reyna að gera áframhaldandi samning,“ segir Kristján. Takist samningar og bankinn haldi áfram að sinna fjármálaþjónustu í flugstöðinni verði uppsagnir starfsmanna afturkallaðar.

Fréttatilkynning Landsbankans í heild sinni

Áframhaldandi hagræðing í Landsbankanum

Landsbankinn vinnur áfram að hagræðingu og breytingum á sínum rekstri. Af þeim sökum fækkar um 30 manns í höfuðstöðvum bankans og að auki hefur ráðningasamningum fastráðinna starfsmanna í afgreiðslu bankans í Flugstöð Leifs Eiríkssonar verið sagt upp, en þar starfa 13 manns.  Uppsögnin í Leifsstöð verður afturkölluð, haldi bankinn áfram að sinna fjármálaþjónustu í flugstöðinni eins og verið hefur.  

Uppsagnirnar í höfuðstöðvum bankans ná til flestra sviða. Úrvinnsla ýmissa mála er tengjast hruninu er nánast lokið og m.a. þess vegna verða gerðar ákveðnar breytingar á skipulagi og mönnun bankans.  Aukin áhersla á rafræna afgreiðslu erinda leiðir til fækkunar og hagræðingar í bakvinnslu og hjá stoðsviðum.

Ákvörðun um uppsögn starfsfólks  í  Flugstöð Leifs Eiríkssonar er varúðarráðstöfun af hálfu Landsbankans vegna óvissu um framhald starfseminnar þar. Þjónustusamningi bankans  var sagt upp á síðasta ári og tilkynnt að fjármálaþjónusta yrði boðin út og átti það að gerast á síðastliðnu hausti. Af því varð ekki og í lok árs var gerður viðauki við þjónustusamning Landsbankans sem fól í sér að afgreiðsla bankans yrði opin til 30. júní 2015. Óvissa ríkir því um það hver muni sinna fjármálaþjónustu í Leifsstöð  eftir það.

Landsbankinn hefur rekið afgreiðslu í Leifsstöð allt frá opnun og hyggst taka þátt í útboði Isavia um bankaþjónustu þegar það verður auglýst.  

Vegna þess fjölda sem um ræðir falla hagræðingaraðgerðirnar undir skilgreiningu hópuppsagna og hefur viðkomandi yfirvöldum verið tilkynnt um þær.