Nýherji snýr tapi í hagnað

„Á undanförnum árum hefur rekstur Nýherja markast af miklum sveiflum sem torvelda samanburð milli ára. Engu að síður er ljóst að síðasta rekstrarár er eitt það besta í ríflega 20 ára sögu félagsins og mjög jákvæður viðsnúningur frá árinu 2013,“ segir Finnur Oddsson, forstjóri Nýherja. Fyrirtækið birti ársuppgjör sitt í dag.

Heildarhagnaður Nýherja á síðasta ári nam 259 milljónum króna á síðasta ári og var hagnaðurinn 110 milljónir á fjórða fjórðungi. Þetta er algjör viðsnúningur frá árinu á undan þegar heildartap á árinu nam 1.608 milljónum króna en tap á fjórða fjórðungi var 496 milljónum.

EBITDA nam 827 milljónum króna á árinu 2014 og 241 milljón króna á fjórða ársfjórðungi, en var 302 milljónir króna árið á undan og 58 milljónir króna á síðasta fjórðungnum árið á undan.

Vöru- og þjónustusala á árinu nam 11.572 milljónum króna og 3.315 milljónum á fjórða ársfjórðungi, en var 10.940 milljónir króna árið á undan og 3.052 milljónir á fjórða fjórðungnum. 

Finnur segir þó að mörg skref séu eftir til að treysta efnahags félagsins. „Þótt stór skref hafi verið stigin á síðasta ári, er umtalsverð vinna eftir, til að treysta afkomu og bæta eiginfjárstöðu félagsins, sem er of lág. Þar horfum við til áframhaldandi hagræðingar í rekstri og breytinga á félagaskipan Nýherja. Aðskilnaður rekstrar TEMPO frá TM Software ehf. er mikilvægt skref í þessari vegferð,“ segir Finnur.