Beint flug frá Akureyri til Kaupmannahafnar

Flugfélagið Greenland Express ætlar að fljúga milli Akureyrar og Evrópu í sumar. AKV greinir frá en þetta kom fram á fundi Markaðsstofu Norðurlands, Atvinnuþróunarfélags Eyjafjarðar, Atvinnuþróunarfélags Þingeyginga, SSNV og Austurbrúar á Hótel KEA í dag .

Haft er eftir Sigurði Pétri Hjaltasyni talsmenni Greeland Express að um sé að ræða flug frá Akureyri til Kaupmannahafnar og síðan áfram til Álaborgar. Stefnt sé að því að hefja flug 11. júní en bókunarkerfið verði komið í loftið eftir um viku.

„Við höfum ákveðið að festa áætlun til 25. nóvember. Stefnan er hins vegar að bjóða upp á þessi beinu flug allt árið og fjölga áfangastöðum. Við erum að skoða samstarf við Isavia og Flugklasann. Gangi það eftir verður hægt að gera áætlun til fleiri ára,“ segir Sigurður Pétur í samtali við AKV.

Hann segir að reynt verði að hafa miðaverðið sambærilegt við það sem þekkist frá Keflavíkurflugvelli þó að meðalverðið verði ef til vill eitthvað hærra. Hann segir markmiðið að gera þjónustuna samkeppnishæfa.

Arnheiður Jóhannsdóttir framkvæmdastjóri Markaðsstofu Norðurlands segir þau hjá Flugklasanum fagna þessu.

Hollenskt flugfélag mun sjá um flugið en Greenland Express hefur umsjón með verkefninu. Notast verður við 100 Fokker-vél af gerðinni F-100. Þá mun vélin geta tekið minnst 2 tonn í frakt.