Flotinn í makríl við Suðurland

Flest íslensku uppsjávarveiðiskipin eru nú að makrílveiðum við suðausturströndina en þar hefur verið ágætis kropp að undanförnu. Rólegt var yfir veiðunum í gær, að sögn Guðlaugs Jónssonar, skipstjóra á Ingunni AK, en hann vonast til þess að aflinn glæðist með hækkandi sjávarhita. Greint er frá á heimasíðu HB Granda.

Skipin eru á veiðum um 35 mílur út af Ingólfshöfða. Þar veiðist nánast hreinn makríll en aflinn hefur verið aðeins blandaðari hjá þeim sem reynt hafa fyrir sér á dýpra vatni. Að sögn Guðlaugs er hitastig sjávar enn mjög lágt, þótt það fari hægt hlýnandi.

Það er vetrartíð á miðunum norðaustur af landinu og þar verður væntanlega enga síld eða makríl að finna fyrr en sjórinn hlýnar. Lundey NS fór í leiðangur um þetta hafsvæði á dögunum og þar var ekkert líf. Makríllinn virðist því halda sig sunnan við landið þar sem sjórinn er heldur hlýrri.

„Makríllinn, sem við höfum verið að veiða, er stór og góður en það mætti vera meira af honum en raunin er í dag,“ segir Guðlaugur.

- shá